(វីដេអូ) ទិដ្ឋភាពក្រោយឆាកនៃការផលិតបទចម្រៀង «ចងចាំសាវតារ» អ្នកគាំទ្រនាំគ្នាផ្ទុះសរសើរព្រាត

បទចម្រៀង «ចងចាំសាវតារ» សម្រាប់ជូនជាពិសេសទៅកាន់អត្ដពលិក កីឡាស៊ីហ្គេម ឆ្នាំ ២០២៣ ទាំងអស់ ដែលបានបកស្រាយរួមគ្នា ពីសំណាក់សិល្បករសិល្បការិនីចំនួន ៦ រូបរបស់ផលិតកម្ម បារមី មានដូចជាលោក វណ្ណដា, កញ្ញា Sophia Kao លោក វណ្ណថាន កញ្ញា ស៊ូ ស៊ីរីកា លោក Norith ព្រមទាំងលោក Juvie Lin ក្រុមចម្រៀង Polarix បានចេញជាផ្លូវការហើយ កាលពីរាត្រីថ្ងៃទី ១​ ខែឧសភា ឆ្នាំ ​២០២៣ កន្លងទៅនេះ។

ស្នាដៃបទចម្រៀងថ្មីនេះដែរ បានធ្វើឱ្យបណ្ដាមហាជនជាច្រើននាំគ្នា ផ្ទុះចែករំលែកបន្ត ព្រមទាំងបញ្ចេញមតិស្រដៀងៗគ្នាព្រៀតថា បទចម្រៀងមួយនេះគឺពីរោះខ្លាំងណាស់ ដែលបានលាយឡំជាមួយនឹងការរ៉េប ភ្លេងបែប Hip Hop ព្រមទាំងភ្លេងបែបប្រពៃណីបុរាណ។

យ៉ាងណាមិញ បន្ទាប់ពីបទមួយនេះបានចេញជាផ្លូវការបានប៉ុន្មាននាទី ក៏ធ្លាយចេញនូវវីដេអូទិដ្ឋភាពពីក្រោយការផលិតបទចម្រៀង «ចងចាំសាវតារ» បានបង្ហោះដោយកញ្ញា Sophia Kao ក្នុងបណ្ដាញសង្គម TikTok ដែលធ្វើឱ្យមហាជនជាច្រើន ផ្ទុះការចែករំលែកបន្តព្រាត។

វីដេអូមួយនេះផងដែរ កញ្ញា Sophia បានថតសឹងគ្រប់សកម្មភាពរបស់សិល្បករ​ ព្រមទាំងផលិតករដែលបានចូលរួមផលិត ទាំងកំឡុងពេលដែលពួកគេធ្វើភ្លេង ពេលថតបទចម្រៀង និង ភាពនឿយហត់របស់ក្រុមការងារទាំងអស់ ព្រមទាំងភ្ជាប់ជាមួយនឹង ​Caption ថា​ ៖ «ដេកគ្រប់បែប»។

មិនតែប៉ុណ្ណោះ យោងតាមគណនីហ្វេសប៊ុកផ្លូវការរបស់លោក Norith ក្រុមចម្រៀង Polarix បានចែករំលែកបន្ថែមថា ៖ «ទម្រាំបានមួយបទនេះដាច់បាយ ដាច់ទឹក ដាច់ដេក» ដែលធ្វើឱ្យមហាជនអ្នកគាំទ្រជាច្រើនបានចូលទៅបញ្ចេញមតិសរសើរព្រាត ព្រមទាំងភ្ជាប់ជាមួយសារអរគុណដល់ទឹកចិត្តសិល្បករសិល្បការិនីទាំងអស់ ដែលខិតខំប្រឹងប្រែងថែរក្សា និង រួមគ្នាអភិវឌ្ឍន៍សម្រាប់សិល្បៈជាតិរបស់ខ្មែរយើង៕

ចង់ជ្រាបកាន់តែច្បាស់ សូមចុចទីនេះ ដើម្បីទស្សនាវីដេអូទី ១ និង សូមចុចទីនេះ ដើម្បីទស្សនាវីដេអូទី ២ ៖