ត្រៀមៗ! ក្ដៅៗក្រសួងប្រកាសចំនួនបេក្ខជន និង មណ្ឌលប្រឡងបាក់ឌុប ឆ្នាំនេះហើយ
ក្រសួងអប់រំ យុជន និងកីឡា ឱ្យដឹងនៅលើទំព័រហ្វេសប៊ុកផ្លូវការថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១៩ សីហា ២០១៩ ខាងមុខនេះ មានបេក្ខជនដាក់ពាក្យសរុប ១១៩ ២១៧នាក់ ស្រី ៦១ ០៣១នាក់ ក្នុងនោះថ្នាក់វិទ្យាសាស្ត្រ ៤៥ ៤១៤នាក់ ស្រី ២៥ ៥២៦នាក់ និង ថ្នាក់វិទ្យាសាស្ត្រសង្គម ៧៣ ៨០៣នាក់ ស្រី៣៥ ៥៣៨នាក់ សំណើមណ្ឌលប្រឡង ២០២ មណ្ឌល ក្នុងនោះថ្នាក់វិទ្យាសាស្ត្រ ៧៥ មណ្ឌល និងថ្នាក់វិទ្យាសាស្ត្រសង្គម ១២៧ មណ្ឌល និង សំណើបន្ទប់ប្រឡងចំនួន ៤ ៨០៩បន្ទប់ ។
នៅព្រឹកថ្ងៃទី ២០ មិថុនា ២០១៩ នេះ ក្រសួងអប់រំ យុវជន និង កីឡា និង អង្គភាពប្រឆាំងអំពើពុករលួយ បានរៀបចំកិច្ចប្រជុំស្ដីពី តួនាទី និងភារកិច្ចរបស់អ្នកសង្កេតការណ៍ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១៩ សីហា ២០១៩ ដើម្បីត្រៀមរៀបចំធ្វើយ៉ាងណា ឱ្យការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និង លទ្ធផលទទួលយកបាន ។
កិច្ចប្រជុំនេះបានប្រព្រឹត្តទៅក្រោមអធិបតីភាព ឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងឯកឧត្ដមបណ្ឌិត ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ នាព្រឹកថ្ងៃព្រហស្បតិ៍ ៣រោច ខែជេស្ឋ ឆ្នាំកុរ ឯកស័ក ព.ស.២៥៦៣ នៅទីស្ដីការក្រសួងអប់រំ យុវជន និងកីឡា ៕
អត្ថបទ ៖ ថោ ច័ន្ទឬទ្ធិ
