ត្រៀម CV! ប៉ុន្មានថ្ងៃទៀត មានឱកាសការងារ ៣ ម៉ឺនកន្លែង មកពីក្រុមហ៊ុនធំៗ ១៥០ ដាក់ពាក្យភ្លាមសម្ភាសភ្លាម នៅកោះពេជ្រ

នៅថ្ងៃទី ១១ ខែតុលា ឆ្នាំ ២០២៤ ទីភ្នាក់ងារជាតិមុខរបរ និង ការងារនៃក្រសួងការងារ និង បណ្តុះបណ្តាលវិជ្ជាជីវៈ បានជូនដំណឹងអំពីពិព័រណ៍ការងារ និង ផលិតភាពជាតិ ដែលជាព្រឹត្តិការណ៍ការងារដ៏ធំប្រចាំឆ្នាំ ជាមួយឱកាសការងារជាង ៣ ម៉ឺនកន្លែងពីក្រុមហ៊ុន រោងចក្រ និង សហគ្រាសធំៗចំនួន ១៥០ ដែលនឹងធ្វើឡើងនៅថ្ងៃទី ២៦-២៧ ខែតុលា ឆ្នាំ ២០២៤ នៅអគារពិព័រណ៍កោះពេជ្រ រាជធានីភ្នំពេញ។

ពិព័រណ៍ការងារ និង ផលិតភាពជាតិ ឆ្នាំ ២០២៤ នេះផងដែរ ត្រូវបានសហការរៀបចំដោយទីភ្នាក់ងារជាតិមុខរបរ និង ការងារ នៃក្រសួងការងារ និង បណ្តុះបណ្តាលវិជ្ជាជីវៈ សហភាពសហព័ន្ធយុវជនកម្ពុជា រាជធានីភ្នំពេញ សមាគមវាយនភណ្ឌ សម្លៀកបំពាក់ ស្បែកជើង និង ផលិតផលធ្វើដំណើរនៅកម្ពុជា មូលនិធិអភិវឌ្ឍន៍ជំនាញ និង ទទួលបានការគាំទ្រដោយអង្គការអន្តរជាតិខាងការងារ ព្រមទាំងដៃគូពាក់ព័ន្ធជាច្រើនទៀត។

តាមរយៈពិព័រណ៍ការងារដ៏ធំនេះ យុវជន សិស្ស និសិ្សត និង អ្នកស្វែងរកការរងារ កុំភ្លេចត្រៀម CV ឱ្យបានច្រើន ដើម្បីចូលរួមដាក់ពាក្យ និង សម្ភាសការងារភ្លាមៗ ជាមួយតំណាងក្រុមហ៊ុនធំៗជាច្រើន និង អាចចូលរួមក្នុងសិក្ខាសាលាអំពីការលើកកម្ពស់ផលិតភាព ដែលមានការចែករំលែកចំណេះដឹង និង បទពិសោធល្អៗពីសំណាក់វាគ្មិនជាតិ និង អន្តរជាតិជាច្រើនផងដែរ។ ព័ត៌មានបន្ថែមសូមទាក់ទងលេខ 017 467 423 ឬ 017 871 807 ឬ Call Center លេខ ១២៩៧ ឬ ១២៨៦៕