បើកទំព័រដើមឆ្នាំថ្មីភ្លាម អ្នកគាំទ្រសង្ស័យ Punjan និង Prang មានទំនាក់ទំនងលើសពីមិត្តភក្តិ

ក្រោយពីក្លាយជាតារាសម្ដែងឯករាជ្យមក តារាស្រី Prang Kannarun កំពុងតែក្ដាប់បានឱកាសសម្តែងរឿងជាបន្តបន្ទាប់ទៅតាមស្ថានីយទូរទស្សន៍ផ្សេងៗក្នុងប្រទេស។ ដូចដែលប្រិយមិត្តធ្លាប់បានដឹងហើយថា តារាស្រី Prang Kannarun ជាតារាស្រីម្នាក់ដែលពោរពេញដោយសមត្ថភាពផ្នែកសម្ដែង មិនថាចរិតតួអង្គបែបណានោះឡើយនាងអាចសម្ដែងបានយ៉ាងល្អ។

បើនិយាយពីដៃគូសម្ដែងវិញ តារាស្រី Prang ធ្លាប់ផ្ទុះកក្រើកខ្លាំងអំឡុងឆ្នាំ ២០១៨ ជាមួយនឹងអ្នកកំលោះ Punjan Prama ក្នុងរឿង «បុព្វេសន្និវាស» ដែលកាលនោះនាងបានសម្ដែងជាតួអ្នកនាង ចាន់វ៉ាត រីឯតារាប្រុស Punjan សម្ដែងជាតួ ឃុនម៉ឺនរឿង។

ក្រោយពីចាប់ដៃគ្នាសម្ដែងក្នុងរឿង «បុព្វេសន្និវាស» មក គេឃើញតារាស្រីប្រុសទាំងពីរមានការគាំទ្រខ្លាំង រហូតមានការផ្គូផ្គងឱ្យតារាប្រុស Punjan និង ស្រីស្អាត Prang ក្លាយជាគូស្នេហ៍គ្នាថែមទៀតផង។

យ៉ាងណាមិញ ចូលឆ្នាំ ២០២៣ នេះ ស្រាប់តែអ្នកកំលោះ Punjan ចេញមកបង្ហោះរូបភាពយ៉ាងស្និទ្ធស្នាលជាមួយនឹង Prang ដែលធ្វើឱ្យមហាជនរំភើបចិត្តជាខ្លាំង ដោយម្នាក់ៗយល់ថាពួកគេទាំងពីរអាចនឹងមានទំនាក់ទំនងគ្នាលើសពីមិត្តភក្តិ។ ដោយឡែក ងាកមើលអ្នកគាំទ្រ ក្រោយឃើញ Punjan និង Prang បង្ហោះរូបបែបនោះពួកគេបានចូលទៅបញ្ចេញមតិ បង្អាប់ឱ្យក្លាយជាសង្សារពិតប្រាកដព្រោងព្រាត ព្រោះតារាប្រុសស្រីគូនេះកំពុងតែ Single ដូចគ្នាស្រាប់៕