(វីដេអូ) មហាជនសរសើរទឹកចិត្ត នីកូ រត់ទៅឱប Jane ភ្លាមៗមិនគិតពីសុខទុក្ខខ្លួន ពេលឃើញប្អូនជួបគ្រោះថ្នាក់

បើទោះជារំលងផុតជាច្រើនថ្ងៃហើយក្តី ប៉ុន្តែរឿងរ៉ាវការជួបគ្រោះថ្នាក់ ភ្លើងឆាបឆេះតារាចម្រៀង Jane អំឡុងពេលថត MV ថ្មី នៅតែជាប្រធានបទត្រូវបានអ្នកគាំទ្រយកមកនិយាយដោយក្តីបារម្ភដដែល។

បើគិតត្រឹមថ្ងៃទី ០៧ ខែមករា ឆ្នាំ ២០២៤ ពោលគឺរយៈពេល ២ ថ្ងៃក្រោយកើតហេតុ កញ្ញា Jane ក៏បានចេញមកប្រាប់ពីស្ថានភាពរបួសនាងត្រង់ចង្ការ និង ក្បាលពោះ គឺបានប្រសើរហើយ ហើយនាងក៏បានបង្ហាញវត្តមានលើឆាកតន្ត្រីជាថ្មីវិញដែរ។

យ៉ាងណាមិញ ងាកទៅកាន់វីដេអូនៃសកម្មភាពក្រៅឆាកដែលត្រូវបានបន្តការចែករំលែកនៅលើបណ្តាញសង្គមវិញ ច្បាស់ជាមហាជនបានឃើញហើយថា អំឡុងពេល Jane បានឆាបឆេះខ្លួននោះ គេឃើញមានបុរសម្នាក់បានរត់ទៅឱប Jane ភ្លាមៗដើម្បីពន្លត់ភ្លើង ហើយបុរសរូបនោះគឺជាតារាចម្រៀង នីកូ។

ក្រោយពីឃើញការលះបង់រត់ទៅឱបសិស្សប្អូនភ្លាមៗ លោក នីកូ ក៏ត្រូវបានមហាជបានចូលទៅបញ្ចេញមតិសរសើរពីទឹកចិត្តរបស់លោកភ្លាម ដោយអំឡុងពេល Jane ឆាបឆេះ លោកគិតដល់មុនគេ គឺសុវត្ថិភាពសិស្សប្អូន​ ស្ទុះចូលទៅភ្លាមមិនខ្លាចថាភ្លើងអាចនឹងរាលដល់លោកនោះទេ៕