ខ្លាំងទាំងចំណេះដឹង ខ្លាំងទាំងការរកស៊ី ប៉េងអាន និង Key ចាប់ដៃគ្នាពិតជាស័ក្តិសមបំផុត

មួយរយៈក្រោយនេះ ប៉េងអាន និង Key ឧស្សាហ៍បង្ហាញមុខជាមួយគ្នានៅលើបណ្តាញសង្គម ដោយបង្ហោះវីដេអូខ្លីៗ និយាយអំពីអាជីវកម្មដែលពួកគេកំពុងធ្វើរួមគ្នា មានដូចជា ហាងសម្លៀកបំពាក់ Attire Lounge ហាងកាហ្វេ Cuffeine: Plant-based Coffee និង បណ្ណាល័យ The Reading Lounge Library។ អាចថាអ្នកទាំងពីរពិតជាដៃគូដ៏ស័ក្តិសម ដែលម្នាក់ៗខ្លាំងទាំងចំណេះដឹង ទាំងបទពិសោធការងារ ជាពិសេសពូកែខាងរកស៊ី មើលមកស៊ីចង្វាក់គ្នាឥតខ្ចោះ។

ក្រឡេកមក ប៉េងអាន បើយោងតាមគណនី LinkedIn លោកមានឈ្មោះពេញ អ៊ុង ប៉េងអាន ជាសហគ្រិន និង កំពុងបម្រើការងារជាអ្នកដឹកនាំគម្រោង ជាទីប្រឹក្សាម៉ាក និង ទំនាក់ទំនង នៅក្រុមហ៊ុនធានារ៉ាប់រងល្បីឈ្មោះមួយនៅទីក្រុងភ្នំពេញ។ នៅឆ្នាំ ២០១៤ លោកទទួលបានអាហារូបករណ៍កម្មវិធីផ្លាស់ប្តូរការសិក្សា ដែលផ្តល់ដោយសាកលវិទ្យាល័យ Kyushu University នៅជប៉ុន ទៅសិក្សានៅសាកលវិទ្យាល័យ Ateneo de Manila University នៅហ្វីលីពីន។ ការសិក្សាអាហារូបករណ៍នេះ លោកទទួលបានពានរង្វាន់អាហារូបករណ៍អាស៊ានវ័យក្មេង ឬ Young ASEAN scholarship award ផងដែរ។

បន្ទាប់មកនៅក្នុងឆ្នាំ ២០១៥ លោកទទួលបានអាហារូបករណ៍ផ្លាស់ប្តូរការសិក្សាឆមាស UGRAD មួយទៀត ទាក់ទងនឹងជំនាញផលិតវីដេអូ ភាពយន្តឯកសារ និង សារគមនាគមន៍ នៅសាកលវិទ្យាល័យ California State University, Monterey Bay នៅរដ្ឋ California សហរដ្ឋអាមេរិក។

ពីឆ្នាំ ២០១២ ដល់ ឆ្នាំ ២០១៦ លោកបានបញ្ចប់ការសិក្សាជំនាញគ្រប់គ្រងប្រព័ន្ធផ្សព្វផ្សាយ សារគមនាគមន៍ និង ផលិតប្រព័ន្ធផ្សព្វផ្សាយ។ ពីឆ្នាំ ២០១៩ ដល់ឆ្នាំ ២០២១ លោកបានសិក្សាថ្នាក់អនុបណ្ឌិតផ្នែកទំនាក់ទំនងសុខភាព និង ហានិភ័យនៅសាកលវិទ្យាល័យ Michigan State University នៅសហរដ្ឋអាមេរិក។ លោកក៏ជាស្ថាបនិកទំព័រហ្វេសប៊ុក Think with PingAnn ដែលបង្កើតវីដេអូចែករំលែកអំពី បញ្ហាសុខភាពផ្លូវកាយ ផ្លូវចិត្ត វិធីសាស្ត្រផ្តល់កម្លាំងចិត្ត និង ចំណេះដឹងផ្សេងៗ។

ងាកមក Key ឯណេះវិញ លោកមានឈ្មោះពិត អ៊ូ តុងហួរ ជាសិល្បករចម្រៀង ជាសហគ្រិន និង ជាស្ថាបនិក វេទិកាអប់រំ DEI Forum Cambodia។ ចំពោះប្រវត្តិការសិក្សា ពីឆ្នាំ ២០១២ – ២០១៦ Key បានបញ្ចប់ថ្នាក់បរិញ្ញាបត្រផ្នែកពាណិជ្ជកម្ម នៅសាកលវិទ្យាល័យ Limkokwing University of Creative Technology។ នៅឆ្នាំ ២០១៧ លោកបានចូលកម្មវិធីសិក្សា YSEALI Academic Fellowship Spring 2017 សិក្សាទៅលើផ្នែកសហគ្រិនភាពសង្គម និង អភិវឌ្ឍន៍សេដ្ឋកិច្ច នៅសាកលវិទ្យាល័យ University of Connecticut នៅសហរដ្ឋអាមេរិក។

ពីឆ្នាំ ២០១៩-២០២១ លោកបានបញ្ចប់បរិញ្ញាបត្រជាន់ខ្ពស់ផ្នែក សហគ្រាសសង្គម នៅសាកលវិទ្យាល័យ American University School of International Service នៅសហរដ្ឋអាមេរិក។ ចាប់ពីឆ្នាំ ២០២១ មក លោកជាសាស្ត្រាចារ្យបង្រៀននិស្សិតនៅសាកលវិទ្យាល័យជាតិគ្រប់គ្រងផងដែរ។ លើសពីនេះ លោកក៏ជាអ្នកប្រឹក្សាឯករាជ្យទៅលើគម្រោងផ្សេងៗទៀតផង។

សព្វថ្ងៃ មិនថា ប៉េងអាន និង Key មមាញឹកនឹងការងាររៀងខ្លួនយ៉ាងណាក្តី អ្នកទាំងពីរតែងឆ្លៀតពេលសកម្មជាមួយអាជីវកម្មដែលបណ្តាក់ទុនរួមគ្នា និង តែងពាំនាំនូវអ្វីដែលថ្មីៗ ដូចជាការបង្កើតមាតិកាវីដេអូ និង ជួយគ្នានៅក្នុងអាជីពរៀងខ្លួនផងដែរ។ ជាក់ស្តែងដូចជាការផលិតចម្រៀងរបស់ Key ប៉េងអានតែងនៅពីក្រោយជាអ្នកដឹក Edit និង ផលិត ជាដើម។ ទាំងនេះហើយជារូបភាព ដែលអាចចាត់ទុកថា អ្នកទាំងពីរពិតជាដៃគូដ៏ស័ក្តិសម និង ស៊ីចង្វាក់បំផុតទាំងការងារ និង ការរកស៊ី៕