មិនធម្មតា! Selena Gomez ឡើងងារជាមហាសេដ្ឋីប្រាក់ពាន់លានដុល្លារត្រឹមវ័យ ៣២ ឆ្នាំ

តារាចម្រៀង Selena Gomez បានក្លាយខ្លួនជាមហាសេដ្ឋីទាំងវ័យក្មេង ក្រោយសម្រេចជោគជ័យលើមុខជំនួញផ្នែកផលិតផលគ្រឿងសម្អាងរបស់នាង (Rare Beauty)។

សារព័ត៌មាន Bloomberg បានលើកឈ្មោះតារាចម្រៀងស្រីវ័យ ៣២ ឆ្នាំរូបនេះបញ្ចូលក្នុងបញ្ជីមហាសេដ្ឋីរបស់ខ្លួនជាលើកដំបូង ក្រោយរូបនាងរកចំណូលបានជោគជ័យខ្លាំងជាមួយនឹងទ្រព្យសម្បត្តិសរុបចំនួន ១.៣ ពាន់លានដុល្លារ។ សារព័ត៌មានដដែលបានបន្ថែមទៀតថា ប្រាក់ចំណូលរបស់នាងមួយចំណែកធំគឺបានពីក្រុមហ៊ុនផលិតគ្រឿងសម្អាង Rare Beauty របស់នាងដែលបានបង្កើតកាលពីឆ្នាំ ២០២០ កន្លងទៅ។

គួរឱ្យដឹងថា កាលពីពេលកន្លងទៅ តារាចម្រៀង Selena Gomez ធ្លាប់បានផ្ដល់កិច្ចសម្ភាសជាមួយទស្សនាវដ្តី Time និយាយពាក់ព័ន្ធនឹងភាគជោគជ័យលើមុខជំនួញរបស់នាង។ នាងបានរៀបរាប់ថា៖ «ខ្ញុំទទួលស្គាល់ថាវាពេលខ្លះធ្វើឱ្យខ្ញុំរំជួលចិត្តខ្លាំង។ ខ្ញុំមិនដែលគិតចង់ឱ្យជំនួញនេះរកលុយបានច្រើនអ៊ីចឹងនោះទេ»៕

ប្រភព៖ 9GAG