(វីដេអូ) គួរឱ្យស្ងប់ស្ញែង! នៅពីក្រោយក្បាច់រាំទន់ភ្លន់ និង ការទ្រង់គ្រឿងជានាដការបាំបុរាណ ព្រះនាងតូច ជេនណា ក្នុងវីដេអូ Trend បាននាដកាឆ្នើមម្នាក់ជួយជ្រោមជ្រែង
ពិតណាស់ ថ្មីៗកន្លងទៅនេះ ស្របពេលមហាជនខ្មែរជាច្រើនរូប មានទាំងអ្នកសិល្បៈ និង អ្នកលេងបណ្ដាញសង្គមជាច្រើន បានពួតដៃគ្នាធ្វើវីដេអូ Khmer Make Up Trend ដើម្បីរួមគ្នាផ្សព្វផ្សាយទម្រង់សិល្បៈ ប្រពៃណី វប្បធម៌ខ្មែរទៅកាន់ពិភពលោក ក៏បានឃើញផេកផ្លូវការរបស់ព្រះនាងតូច នរោត្តម ជេនណា បង្ហាញវីដេអូចូលរួមលេង Challenge នេះដែរ។
ក្នុងនោះ ព្រះនាងតូច នរោត្តម ជេនណា បានសព្វព្រះទ័យចូលរួមលេង Khmer Make Up Trend ដោយបានធ្វើវីដេអូបង្ហាញពីសិល្បៈខ្មែរជាច្រើនទម្រង់យ៉ាងល្អឥតខ្ចោះ និង ព្រឺសម្បុរខ្លាំង ដែលព្រះនាងបានទ្រង់គ្រឿងអប្សរាខ្មែរ, ទម្រង់របាំបុរាណ មានរបាំព្រះរាជទ្រព្យ, គូរមុខច្នៃប្រឌិត បែប Fantasy ជារូបប្រាសាទអង្គរ និង ផែនទីកម្ពុជា, គ្រងឈុតល្បុកតោ និង ឈុតរបាំខ្មែរទម្រង់ ១០០ ឆ្នាំ។
វីដេអូនៃការចូលរួមលេង Make Up Challenge របស់ព្រះនាងតូច កំពុងផ្ទុះការចែករំលែកខ្លាំងពីមហាជនពាសពេញបណ្ដាញសង្គម ដោយភ្ជាប់ជាមួយនឹងក្ដីរំភើប និង ស្ងើចសរសើរចំពោះការបង្ហាញពីសិល្បៈវប្បធម៌ដ៏អស្ចារ្យល្អផូរផង់នេះ។
យ៉ាងណាមិញ ក្រោយពីទទួលបានការចែករំលែកដោយក្ដីពេញចិត្ត និង សរសើរខ្លាំងពីមហាជនលើបណ្ដាញសង្គម ក៏បានឃើញហ្វេសប៊ុកផេករបស់ ព្រះនាងតូច នរោត្តម ជេនណា បានបង្ហោះជាថ្មី ដោយទ្រង់បានបង្ហាញព្រះទ័យថ្លែងអំណរគុណដល់មហាជនចំពោះការគាំទ្រនូវវីដេអូរបស់ទ្រង់ ព្រមទាំងបង្ហាញឱ្យដឹងថាអ្នកនៅពីក្រោយនៃការបង្ហាញក្បាច់រាំរបាំដ៏ទន់ភ្លន់ល្វត់ល្វន់ និង ទ្រង់គ្រឿងជានាដការរបាំបុរាណ គឺមានការជួយជ្រោមជ្រែងដោយនាដកាឆ្នើមប្រកបដោយទេពកោសល្យម្នាក់ គឺ អ្នកគ្រូ វ័ន សាវៃ។
ជាមួយគ្នានោះ ព្រះនាងតូច នរោត្តម ជេនណា ក៏បានបង្ហាញព្រះទ័យអរគុណដល់អ្នកដែលនៅពីក្រោយនៃការផលិតវីដេអូនេះទាំងអស់ដែរថា ៖ «ខ្ញុំពិតជាអរគុណ និង ស្ញប់ស្ញែងយ៉ាងជ្រាលជ្រៅ ចំពោះអ្នកគ្រូ Voan Savay / Meas Vanroeun បង Van Vart – វ៉ាត វ៉ាន់ បង TaTa Make Up Real បងៗអ្នកស្លៀកឈុតខ្មែរ បងៗអ្នកថតវីដេអូ និង ក្រុមការងារទាំងអស់សម្រាប់ការងារមួយនេះ ការថតមួយនេះចាប់ផ្តើមតាំងពីម៉ោង ៤ ល្ងាច ក្រោយការចេញពីសាលារហូតដល់ម៉ោង ៧ ភ្លឺ ពីរថ្ងៃជាប់គ្នា។ ខ្ញុំគ្មានពាក្យពេចន៍ក្រៅពីការអរគុណយ៉ាងជ្រាលជ្រៅចំពោះការចំណាយទាំងកម្លាំងកាយ កម្លាំងចិត្ត និង ពេលវេលាដ៏មានតម្លៃមួយនេះ ហើយក៏សូមអរគុណដល់អ្នកដែលបានចូលរួមធ្វើវីដេអូដើម្បីចូលរួមផ្សព្វផ្សាយ លើកស្ទួយនូវវប្បធម៌ខ្មែរ។ ក្នុងនាមខ្ញុំ ជាកូនខ្មែរ ខ្ញុំពិតជាមានមោទភាពដែលខ្មែរយើងមាននូវវប្បធម៌ អរិយធម៌ដ៏អស្ចារ្យ»៕
សូមទស្សនាវីដេអូខាងក្រោម៖
