ត្រៀមផ្ដល់កម្លាំងចិត្ត! ហង្ស ម៉ានីតា នឹងធ្វើដំណើរទៅប្រកួត Miss Universe នៅសហរដ្ឋអាមេរិកចុងខែនេះហើយ

ពិតណាស់ ក្រោយពីទទួលបានជ័យលាភីគ្រងមកុដ Miss Universe Cambodia ប្រចាំឆ្នាំ ២០២២ បវរកញ្ញា ហង្ស ម៉ានីតា បានធ្វើការពង្រឹងសមត្ថភាពហ្វឹកហាត់ត្រៀមខ្លួនអស់ជាច្រើនខែមកហើយដើម្បីតំណាងកម្ពុជាចូលរួមប្រកួតលើឆាកអន្តរជាតិ Miss Universe 2022 លើកទី ៧១។

យ៉ាងណាមិញ ស្របពេលបវរកញ្ញា ហង្ស ម៉ានីតា កំពុងធ្វើការហ្វឹកហាត់ត្រៀមខ្លួនសម្រាប់ឈរលើឆាកអន្តរជាតិនេះដែរ ថ្មីៗកន្លងទៅក៏បានឃើញបណ្ដាញសង្គមហ្វេសប៊ុកផេកផ្លូវការរបស់ Miss Universe បានធ្វើការបង្ហោះជូនដំណឹងជាផ្លូវការណ៍បានឱ្យដឹងថាការប្រកួត Miss Universe 2022 លើកទី ៧១ នឹងធ្វើឡើងនៅ New Orleans រដ្ឋ Louisiana សហរដ្ឋអាមេរិក នៅថ្ងៃទី ១៤ ខែមករា ឆ្នាំ ២០២៣ ខាងមុខនេះ។

ដោយឡែក មុននេះបន្តិច តាមរយៈបណ្ដាញសង្គមហ្វេសប៊ុកផេកផ្លូវការ Miss Universe Cambodia ក៏បានបង្ហោះសារជូនដំណឹងឱ្យដឹងថាបវរកញ្ញា ហង្ស ម៉ានីតា នឹងត្រៀមចេញដំណើរហោះទៅសហរដ្ឋអាមេរិកដើម្បីចូលរួមប្រកួត Miss Universe 2022 នៅថ្ងៃទី ២៧ ខែធ្នូ ឆ្នាំ ២០២២ ខាងមុខនេះហើយ។

ក្រោយទទួលដំណឹងនេះដែរ មហាជនអ្នកគាំទ្រវិស័យបវរកញ្ញាកាន់តែបង្ហាញចិត្តអន្ទះសាចង់ឃើញបវរកញ្ញាកម្ពុជា ហង្ស ម៉ានីតា ឈរលើឆាកដ៏អស្ចារ្យនេះ ព្រមទាំងបានធ្វើការបញ្ចេញមតិជួយផ្ដល់កម្លាំងចិត្តចំពោះនាងផងដែរ៕