ស្ដាប់ចម្រៀងលោក ណូយ វ៉ាន់ណេត យូរហើយទើបដឹងបទ «ដើមត្នោត» ជាបទដំបូង ហើយធ្លាប់ឈ្នះមេដាយទៀត

ដូចប្រិយមិត្តបានស្គាល់រួចមកហើយ លោក ណូយ វ៉ាន់ណេត គឺជាសិល្បកររៀមច្បងមួយរូបដែលទទួលបានការស្រឡាញ់ចូលចិត្តពីបណ្ដាមហាជនគ្រប់ស្រទាប់វណ្ណៈ ព្រោះថាទឹកដមសំឡេងផ្អែមពីរោះរបស់លោក បានបំពេអារម្មណ៍ទស្សនិកជនឱ្យទោរទន់ទៅនឹងសំនៀងដ៏ពីរោះរណ្ដំចិត្តរបស់លោកមិនប្រែប្រួលឡើយ។

ណូយ វ៉ាន់ណេត បានបោះជំហានចូលប្រឡូកយ៉ាងពេញទំហឹងក្នុងវិស័យសិល្បៈអស់រយៈពេលជាង ៤០ ឆ្នាំមកហើយ ពោលគឺលោកចូលសិល្បៈតាំងពីអំឡុងឆ្នាំ ១៩៨០ មកម្ល៉េះ។ តារាជើងចាស់រូបនេះបានទម្លាយថា បទចម្រៀងដំបូងរបស់លោក គឺមានចំណងជើងថា «ដើមត្នោត» ជាបទ Original Song បកស្រាយរួមគ្នាជាមួយអ្នកស្រី សោម សារឿន ក្នុងឆ្នាំ ១៩៨២ ហើយកាលនោះបទចម្រៀងនេះក៏បានប្រឡងទូទាំងប្រទេសឈ្នះបានមេដាយសំរិទ្ធទៀតផង។

ចាប់តាំងពីមានឈ្មោះល្បីកាលជំនាន់ឆ្នាំ ៨០ នោះមក តារារៀមច្បង ណូយ វ៉ាន់ណេត បានបាចសាចភាពល្បីល្បាញក្នុងស្រទាប់មហាជនយ៉ាងច្រើនក្រាស់ក្រែល ដោយត្រូវបានទស្សនិកជនស្រឡាញ់ពេញចិត្តនូវទឹកដមសំឡេងផ្អែមពីរោះប្លែកពីគេ ក៏ដូចជាអត្ថន័យក្នុងបទចម្រៀងនីមួយៗ ដែលបានបំពេអារម្មណ៍អ្នកស្ដាប់ឱ្យលន្លង់លន្លោច ស្ដាប់មិនចេះជិនណាយ។

រំឭកដល់បទចម្រៀងពីរោះៗរបស់ ណូយ វ៉ាន់ណេត កាលពីពេលកន្លងទៅ តារាជើងចាស់រូបនេះ បានបង្ហើបឱ្យដឹងថា បើគិតចាប់តាំងពីលោកចូលប្រឡូកសិល្បៈដំបូងរហូតមកដល់បច្ចុប្បន្ន លោកមានបទចម្រៀងផ្ទាល់ខ្លួនមិនក្រោម ៣ ពាន់បទនោះទេ ដែលបទនីមួយៗសុទ្ធសឹងតែទទួលបានការគាំទ្រស្ដាប់ និង ពេញនិយមក្នុងស្រទាប់មហាជន៕