មានវ័យ ២៦ ឆ្នាំ លោក ស៊ូ សេដ្ឋី (SETHEY SOU) ជានាយកប្រតិបត្តិនៃក្រុមហ៊ុនដឹកជញ្ជូន Jalat Logistics ដែលកំពុងមានទីផ្សារខ្ពស់នៅកម្ពុជា។ លោកបានបង្កើតក្រុមហ៊ុននេះនៅអំឡុងការបិទខ្ទប់កូវីដ-១៩។ មានចំណេះដឹងខ្ពង់ខ្ពស់ លោកបានបញ្ចប់បរិញ្ញាបត្រ Digital Business MSc ពីសាកលវិទ្យាល័យ University of Westminster នៅទីក្រុងឡុងដ៍ ចក្រភពអង់គ្លេស។
សមិទ្ធផលរបស់លោករួមមាន ការឈ្នះលេខ ១ នៅក្នុងកម្មវិធីប្រកួតចាប់ផ្តើមអាជីវកម្ម ASEAN-Korea Startup Week នៅក្នុងឆ្នាំ ២០២១ និង ឆ្នាំដដែល លោកបានប្រកួតក្នុងកម្មវិធីសហគ្រិន Mayor Entrepreneur Programme and Competition រៀបចំដោយ Mayor’s Fund for London នៅទីក្រុងឡុងដ៍ ដោយប្រកួតឈានដល់វគ្គពាក់កណ្តាលផ្តាច់ព្រ័ត្រ។
ជាមួយការដឹកនាំអាជីវកម្មប្រកបដោយភាពរីកចម្រើន ថ្មីៗនេះក្រុមហ៊ុនដឹកជញ្ជូនរបស់លោក ទទួលបានពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ (Minister Startup of the Year) នៅក្នុងកម្មវិធីប្រកួតប្រជែងពានរង្វាន់ឌីជីថលកម្ពុជា ២០២៤ (Cambodia Digital Awards 2024) កាលពីថ្ងៃទី ២៩ ខែវិច្ឆិកា កន្លងទៅនេះ។
ជាអ្នកដឹកនាំអាជីវកម្មដ៏មានឥទ្ធិពល កន្លងទៅ លោកក៏ត្រូវបានសារព័ត៌មានអន្តរជាតិ Prestige ជ្រើសរើសជាបុគ្គលមួយរូបនៅក្នុងកម្មវិធី «Prestige 40 under 40» ដែលផ្តោតលើកកម្ពស់បុគ្គលចំនួន ៤០ នាក់ អាយុក្រោម ៤០ ឆ្នាំ ដែលបានបង្ហាញពីស្នាដៃល្អគួរឱ្យកត់សម្គាល់ បង្ហាញពីភាពល្អឯក និង មានឥទ្ធិពលដល់សហគមន៍ ឬវិស័យរបស់ពួកគេ នៅលើជាតិមួយឬទូទាំងពិភពលោក។
ជាស្ថាបនិក និង ជានាយកប្រតិបត្តិវ័យក្មេង លោក ស៊ូ សេដ្ឋី ក៏មានមុខមាត់រាងរៅសង្ហា ឬ អាចថាជាបុរសក្នុងក្តីប្រាថ្នារបស់នារីគ្រប់រូប តែគួរឱ្យខូចចិត្តលោកទើបតែបញ្ចប់ភាពនៅលីវ រៀបមង្គលការយ៉ាងអធិកអធមកាលពីថ្ងៃទី ០៦ ខែវិច្ឆិកា ឆ្នាំ ២០២៤ កន្លងទៅនេះ៕
ប្រភព៖ Prestige
