អ្នកគាំទ្រ Andy Lau កាន់តែព្រួយចិត្ត ក្រោយឃើញសភាព Idol ស្លេកស្លាំងខ្លាំង
កាលពីពេលថ្មីៗនេះ តារាសម្ដែងហុងកុងជើងចាស់ដ៏ល្បី Andy Lau បានបង្ហោះវីដេអូខ្លីមួយនៅលើ Douyin (TikTo ចិន) ចែករំលែកអំពីថ្ងៃធ្វើការរបស់លោក ជាមួយនឹងចំណងជើងថា៖ «ការថតថ្ងៃចុងក្រោយ»។
ក្នុងវីដេអូនោះ តារាប្រុសរូបនេះបានកំពុងអង្គុយក្នុងឡាននៅកន្លែងថត។ បើមើលទៅការរៀបចំខ្លួនរបស់លោក គឺមើលទៅមានភាពសាមញ្ញបំផុត ពាក់នូវអាវយឺតខ្មៅ និង ខោក្រណាត់ខ្លីត្រឹមជង្គង់។ ហើយពេលបើកទ្វារឡានឃើញកាមេរ៉ា លោកបានលើកដៃស្វាមគន៍យ៉ាងរាក់ទាក់។
ទោះជាយ៉ាងណាក៏ដោយ កំពូលតារាសម្ដែងហុងកុងរូបនេះ ហាក់ដូចជាមិនបានសម្រាកគ្រប់គ្រាន់ទេ បើមើលទៅភ្នែករបស់លោកដូចជាអស់កម្លាំងខ្លាំង។ ខណៈកំពុងផាត់មុខថតសម្ដែង តារាប្រុសរូបនេះបង្ហាញឃើញមុខស្លេកស្លាំង ស្នាមជ្រួញនៅគ្រប់ជ្រុងភ្នែកយ៉ាងច្បាស់។ មិនតែប៉ុណ្ណោះ ការដើរតួរបស់លោកក្នុងរឿងថ្មីនេះ គឺលែងមានភាពស្វាហាប់ និងរហ័សរហួនដូចពេលមុនទៀតហើយ។
ក្រោយពីបានឃើញសភាពបែបនេះ អ្នកគាំទ្រ Andy Lau គ្រប់គ្នាបានបង្ហាញការព្រួយបារម្ភខ្លាំងអំពីស្ថានភាពសុខភាពរបស់លោក។ ដោយឃើញមានមហាជនជាច្រើនបានណែនាំឱ្យតារាប្រុសរូបនេះ យកចិត្តទុកដាក់លើសុខភាព កុំធ្វើការហួសហេតុពេក ព្រោះលោកក៏មានអាយុ ៦១ឆ្នាំហើយ មិនអាចប្រៀបធៀបជាមួយនឹងកាលពីមុនបានទេ។
ក្រៅពីនេះ ក៏មានមនុស្សជាច្រើនបានសរសើរដល់លោក ចំពោះស្មារតីភាពទទួលខុសត្រូវ មិនខ្លាចការនឿយហត់ និងលះបង់ទាំងកម្លាំងកាយចិត្តក្នុងការសម្ដែង៕
