ពេលដឹងអ្នកគាំទ្រថាធ្វើបទមិនល្អដូចមុន ថេណា ស្រាប់តែលើកហេតុផលនេះប្រាប់អ្នកគាំទ្រវិញភ្លាម

ថ្មីៗនេះ តារាចម្រៀងប្រុសស្ថិតក្នុងដួងចិត្តយុវវ័យ ថេណា បានបង្ហោះសារមួយនៅលើបណ្ដាញសង្គមហ្វេសប៊ុក បង្កឱ្យមានការចាប់អារម្មណ៍ជាខ្លាំងពីសំណាក់អ្នកគាំទ្រ។

សារដែលម្ចាស់បទ «កង់សាគួរ» រូបនេះ បានបង្ហោះនៅលើបណ្ដាញមានអត្ថន័យថា ៖ «ប៉ុន្មានឆ្នាំនេះខ្ញុំបានធ្វើបទច្រើនប្រភេទណាស់រហូតដល់ Fans ម៉ឺនឆ្នាំរបស់ខ្ញុំមានអារម្មណ៍ថាខ្ញុំផ្លាស់ប្ដូរច្រើន បទមិនល្អដូចពីមុន ចង់ស្ដាប់បទប្រភេទមុនជាង តាមពិតទៅខ្ញុំមិនផ្លាស់ប្ដូរទៅណាទេ ខ្ញុំគ្រាន់តែចង់នាំអ្នកទាំងអស់គ្នាឱ្យស្គាល់អ្វីថ្មីៗ និង ចង់បង្ហាញពីសមត្ថភាពខ្លួនឯងក្នុងការធ្វើភ្លេងតែប៉ុណ្ណោះ តែមិនយូរទេខ្ញុំនឹងផ្តល់អារម្មណ៍ចាស់ឱ្យអ្នកទាំងអស់គ្នាវិញ បទនៅច្រើនណាស់កុំភ័យគ្រាន់តែមិនទាន់ដឹងចេញបទអីមុន»។

កន្លងមកគេកម្របានឃើញ ថេណា បង្ហាញអារម្មណ៍បែបនេះនៅលើបណ្ដាញសង្គមណាស់ តែយ៉ាងណាលោកបានបញ្ជាក់ប្រាប់អ្នកគាំទ្រច្បាស់លាស់ហើយថា លោកមិនបានផ្លាស់ប្ដូរស្ទីលទៅណាឡើយ គ្រាន់តែចង់នាំអារម្មណ៍អ្នកគាំទ្រឱ្យស្គាល់អ្វីដែលថ្មីៗប៉ុណ្ណោះ ក្នុងនោះអ្នកគាំទ្រក៏ទន្ទឹងរង់ចាំស្ដាប់បទថ្មីរបស់ ថេណា យ៉ាងអន្ទះសាផងដែរ៕