អាយដលប៉ះអាយដល! លីម តិចម៉េង ចួប ថេណា ម្ដង ពោលពាក្យយ៉ាងគោរពដាក់រៀមច្បង

តារាចម្រៀងពន្លកថ្មីដែលកំពុងទទួលបានសន្ទុះនៃការគាំទ្រយ៉ាងខ្លាំងពីសំណាក់ទស្សនិកជនគ្រប់ស្រទាប់ លីម តិចម៉េង មិនត្រឹមតែឆក់បានបេះដូងអ្នកគាំទ្រតាមរយៈទឹកដមសំឡេងដ៏ធ្ងន់ពីរោះជាប់ចិត្តតែមួយមុខទេ ប៉ុន្ដែអ្នកគាំទ្រជាច្រើនក៏ពេញចិត្តចំពោះអត្តចរិតល្អ ពូកែលេងសើច និង កាយវិការក្រមិមក្រមើមរបស់រូបគេផងដែរ។

យ៉ាងណាមិញ កាលពីរាត្រីថ្ងៃទី ៦ ខែកុម្ភៈ ឆ្នាំ ២០២៣ កន្លងទៅនេះ លីម តិចម៉េង បានចូលរួមក្នុងកម្មវិធីរបស់ហាងពេជ្រមួយក្នុងរាជធានីភ្នំពេញ ជាមួយនឹងសិល្បករសិល្បការិនីរៀមច្បងជាច្រើនរូបផ្សេងទៀត។

ដោយឡែក អ្វីដែលកាន់តែធ្វើឱ្យមហាជនអ្នកគាំទ្រកាន់តែចាប់អារម្មណ៍ទៅទៀតនោះគឺលោក លីម តិចម៉េង បានបង្ហោះរូបភាពមួយសន្លឹកជាមួយនឹងតារាចម្រៀងសំនៀងផ្អែមលោក ថេណា ព្រមទាំងភ្ជាប់ជាមួយនឹងពាក្យពេចន៍យ៉ាងគួរឱ្យគោរពដាក់រៀមច្បងរបស់ខ្លួនទៀតផង។

ដោយក្នុង Caption នោះ គេបានរៀបរាប់ថា ៖ «មិនងាយបានជួបរៀមច្បងៗទេ អ៊ីចឹងហើយត្រូវតែថតជាមួយគាត់តាមដែលអាចធ្វើបាន» ព្រមទាំងភ្ជាប់ជាមួយកូនរូបភាព Emoji យ៉ាងមានន័យផងដែរ៕