ក្ដៅគគុក! ក្រោយពេលលាឈប់ពីក្រុមហ៊ុន អតីតអ្នកបង្កើត AI ម្នាក់របស់ Google ព្រមានពីគ្រោះថ្នាក់របស់ AI នៅថ្ងៃអនាគត

មួយរយៈក្រោយនេះ គេសង្កេតឃើញថាការវិវិឌ្ឍន៍នៃបច្ចេកវិទ្យា AI ឬ Artificial Intelligence ហាក់កាន់តែរីកចម្រើនខ្លាំង និងមានឆ្លាតវៃជាងមុនច្រើន ដោយនាពេលបច្ចុប្បន្នវាអាចមានសមត្ថភាពកែច្នៃបង្កើតរូបភាព តបសារឆ្លើយឆ្លងមនុស្ស ហើយក៏មានក្រុមហ៊ុនខ្លះបានបង្កើត AI ជំនួយដល់ការកាត់វីដេអូថែមទៀត។

យ៉ាងណាមិញ ទន្ទឹមនឹងការសាទរនៃភាពចម្រើនរបស់ AI លោក Geoffrey Hinton ដែលត្រូវបានគេស្គាល់ថាជាអតីតបុគ្គលិករបស់ Google និងជាបុគ្គលសំខាន់មួយដែលបង្កើត AI រហូតជាប់ឈ្មោះជា ឪពុកធម៌របស់ AI បានចេញសេចក្ដីព្រមានស្ដីពីភាពគ្រោះថ្នាក់របស់ AI នាពេលអនាគត។

លោក Geoffrey Hinton បានរៀបរាប់ថា៖ «ពេលនេះ AI អាចមិនទាន់ឆ្លាតជាងពួកយើងទេ តាមដែលខ្ញុំអាចប្រាប់បាន ប៉ុន្ដែខ្ញុំគិតថាមិនយូរទៀតទេពួកគេនឹងឆ្លាតជាងនេះទៅទៀត។ ហើយនៅពេលនោះគ្រប់យ៉ាងនឹងកាន់តែគួរឱ្យខ្លាច។ បច្ចុប្បន្នខ្ញុំអាយុ ៧៥ ឆ្នាំហើយ ខ្ញុំបានចូលនិវត្តន៍ហើយ ហេតុដូចនេះខ្ញុំអាចប្រាប់អ្នកទាំងអស់គ្នានូវរឿងមួយចំនួនប៉ុណ្ណោះ»។

«នៅពេលអនាគត នៅពេលដែល AI កាន់តែឆ្លាតវៃ ការងារចំនួន ៣០០ លាននឹងត្រូវប៉ះពាល់ ហើយតួនាទីមួយចំនួន នឹងលែងត្រូវការមនុស្សធ្វើការទៀត។ ជាក់ស្ដែងខ្ញុំតែងលួងចិត្តខ្លួនឯងថា ប្រសិនបើខ្ញុំមិនបានធ្វើវាទេ និងមានអ្នកផ្សេងធ្វើវាឱ្យ AI នេះឆ្លាត។ សាកស្រមៃមើលថា បើដូចនៅក្នុងខ្សែភាពយន្ដមានតួអង្គមិនល្អ ហើយគេបានប្រើប្រាស់ AI ក្នុងផ្លូវមិនល្អតើអាចនឹងមានអ្វីកើតឡើង វាអាចនឹងក្លាយជាសុបិនអាក្រក់របស់អ្នកគ្រប់គ្នា»។

«ភាពខុសគ្នារវាងមនុស្ស និង AI គឺមនុស្សយើងជាប្រព័ន្ធជីវសាស្ត្រ ចំណែក AI ជាប្រព័ន្ធឌីជីថល ហើយវាខុសគ្នាខ្លាំងព្រោះ​តែបច្ចេកវិទ្យាឌីជីថល គឺអ្នកអាចចម្លង (Copy) អ្វីដែលដូចគ្នាបានមិនថារូបរាង កម្ពស់ ទម្ងន់។ ហើយរាល់ការចម្លងបង្កើតគឺត្រូវបានចម្លងទាំងភាពឆ្លាតវ័យ និងទិន្នន័យដែលផ្ទុករួចស្រាប់។ វាដូចជាយើងបង្កើតមនុស្ស ១០ ០០០ នាក់ហើយមានខួរក្បាលតែមួយ តែនៅពេលមានមនុស្សតែម្នាក់ក្នុងចំណោមនោះរៀនអ្វីដែលថ្មី នោះអ្នកនៅសល់នឹងចេះដឹងវាដោយស្វ័យប្រវត្តិ។ ហើយបែបនេះហើយបាន AI Chatbots ចេះដឹងច្រើនជាងហាក់បីមានមនុស្សជាច្រើននាក់បញ្ចូលគ្នា»។

«មួយវិញទៀត ទោះបីអ្នករាល់គ្នានៅអាមេរិកខ្លាចហានិភ័យឈប់អភិវឌ្ឍវាក៏ដោយ ក៏ចិននឹងបន្ដធ្វើវាដដែល។ តែខ្ញុំគឺជាអ្នកជំនាញវិទ្យាសាស្ត្រមិនមែនគោលនយោបាយ ហេតុដូចនេះទំនួលខុសត្រូវធំគឺបន្ទុករបស់រដ្ឋាភិបាលថាតើ AI នឹងត្រូវបង្កើតឡើងក្នុងទម្រង់ណា។ ខ្ញុំចង់បញ្ជាក់ជាចុងក្រោយថា AI Chatbots គឺត្រឹមជាផ្នែកមួយនៃការសិក្សា AI តែប៉ុណ្ណោះ នាពេលអនាគតវាអាចនឹងដណ្ដើមការងារមនុស្សរាប់លាននាក់ ហើយការងារខ្លះនឹងត្រូវបាត់បង់លែងជាមនុស្សអ្នកធ្វើការ»៕

ប្រភព៖ BBC