១ ខែៗលោក សៀង ឈឿន រកបានពី ១២០០ ទៅ ១៥០០ ដុល្លារ ពីរបរចិញ្ចឹមកង្កែប ត្រីអណ្តែង និង មាន់ខ្មៅ

មិនបាច់ទៅរកការងារធ្វើនៅស្រុកឆ្ងាយនោះទេ លោក សៀង ឈឿន ត្រូវបានអ្នកភូមិព្រែកភ្នៅ ឃុំព្រែកភ្នៅ ស្រុកពារាំង ខេត្តព្រៃវែង ចាត់ទុកជាកសិករគំរូមួយរូប ដោយលោកបានបើកកសិដ្ឋានចិញ្ចឹមកង្កែប ត្រីអណ្តែង និង មាន់ខ្មៅ សម្រាប់លក់ ដោយក្នុងមួយខែៗលោកអាចរកប្រាក់ចំណូលបានចន្លោះពី ១២០០ដុល្លារ ទៅ ១៥០០ដុល្លារ សម្រាប់ផ្គត់ផ្គង់ជីវភាពគ្រួសាររស់យ៉ាងស្រួល ។

នៅខណៈពេល ដែលឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទបានចុះទៅពិនិត្យដល់កសិដ្ឋានរបស់លោកនោះ លោក សៀង ឈឿង មានប្រសាសន៍ថា បច្ចុប្បន្ន នៅក្នុងកសិដ្ឋានរបស់ខ្ញុំនេះ មានចិញ្ចឹមកង្កែបញីចំនួន ៥០០ក្បាល និង កង្កែបឈ្មោលចំនួន ៤០០ក្បាល ទុកសម្រាប់បង្កាត់យកកូនលក់បានតម្លៃ ២៥០០រៀលក្នុងមួយគីឡូក្រាម ។ ក្រៅពីកង្កែបមានមាន់ខ្មៅ និង ចិញ្ចឹមត្រីអណ្តែងក្នុងរណ្តៅក្រាលតង់កៅស៊ូ ដោយចិញ្ចឹមមាន់ពីលើ និង ចិញ្ចឹមកង្កែបក្នុងកង់រថយន្តនៅជុំវិញរណ្តៅ ធ្វើរបៀបនេះគឺដើម្បីកាត់បន្ថយចំណីត្រី ព្រោះត្រីស៊ីលាមកមាន់ និង រក្សាក្សេត្របរិស្ថានរវាងត្រី និង កង្កែប ដែលរស់នៅជិតគ្នា។ ហើយក្នុងមួយខែៗរូបលោកអាចរកចំណូលពីមុខរបរចិញ្ចឹមកង្កែប ត្រីអណ្តែង និង មាន់ខ្មៅបានចំនួនពី ១២០០ ដុល្លារ ទៅ ១៥០០ដុល្លារ ។

លោក សៀង ឈឿង មានប្រសាសន៍បន្តទៀតថា បច្ចុប្បន្ន លោកមានអតិថិជនមកទាក់ទង់ទិញកូនមាន់ខ្មៅ និង ពូជកង្កែបពីកសិដ្ឋានរបស់លោកយ៉ាងច្រើន ដែលលើសពីសមត្ថភាពផលិតរបស់កសិដ្ឋានលោក តែទោះជាយ៉ាងណា លោកនឹងខិតខំពង្រីកអាជីវកម្មផលិតពូជកង្កែប និងមាន់ខ្មៅនេះឱ្យបានច្រើនបន្ថែមទៀត ដើម្បីបំពេញតាមតម្រូវការរបស់អតិថិជន៕