Nadech គិតហើយស្រេច បើថ្ងៃណាមួយសម្ដែងលេងកើត នឹងទៅធ្វើការងារផ្នែកនេះវិញ
Nadech Kugimiyas តារាប្រុសលំដាប់កំពូលមួយរូបប្រចាំប៉ុស្តិ៍លេខ ៣ ដែលមានទាំងរូបសម្បត្តិស្រស់សង្ហា មានសមត្ថភាព ទេពកោសល្យ និង ប្រជាប្រិយខ្ពស់។
កាលពីកន្លងទៅថ្មីៗនេះ តារាប្រុសរូបនេះធ្លាប់បានចូលផ្តល់បទសម្ភាស ក្នុងកម្មវិធី Hone Krasae របស់ស្ថានីយ៍ប៉ុស្តិ៍លេខ ៣ ដោយបានអាប់ដេតពីជីវិតរស់នៅប្រចាំថ្ងៃ និង រឿងរ៉ាវមួយចំនួនទាក់ទងនឹងខ្លួនលោកផ្ទាល់។
ក្នុងនោះ Nadech ក៏បានបង្ហើបរៀបរាប់ប្រាប់ថា ៖ «តាមពិតទៅខ្ញុំជាមនុស្សស្រឡាញ់សិល្បៈ ស្រឡាញ់គ្រប់ការងារនៅក្នុងផ្នែកសិល្បៈ ជាពិសេសផ្នែកសម្តែង តែខ្ញុំមិនដឹងថាខ្លួនឯងអាចដើរតួឯកបានយូរឆ្នាំប៉ុនណានោះទេ ព្រោះអនាគតទៅមិនដឹងថារូបរាង មុខមាត់ នឹងទៅជាយ៉ាងណា តែបើនៅមានការផ្តល់ឱកាសឱ្យសម្តែង ខ្ញុំនឹងបន្តការងារមួយនេះ មិនថាជាតួរាយរ៉ង តួចិត្តអាក្រក់ តួអមឆាក ឬតួអ្វី ខ្ញុំមិនប្រកាន់ ឬរើសតួនោះឡើយ»។
«ក្រៅពីអាជីពជាតារាសម្តែង ខ្ញុំក៏បានសម្លឹងពីអាជីពផ្សេងៗដែលមានក្នុងពិភពសិល្បៈនេះផងដែរ ដោយខ្ញុំចាប់អារម្មណ៍តាំងពីក្រុមការងារ Pre-Production នៃរឿង ក្រុមថត ក្រុមដឹកនាំ និង ក្រុមបច្ចេកទេសផ្សេងៗ និយាយរួមទៅខ្ញុំកំពុងសិក្សាពីផ្នែកនីមួយៗនៃឧស្សាហកម្មភាពយន្ត»។
«ព្រោះប្រសិនបើអាជីពនាថ្ងៃអនាគតខ្ញុំមិនអាចបានដើរតួអង្គក្នុងរឿង ខ្ញុំអាចនឹងធ្វើការងារដែលពាក់ព័ន្ធនឹងរឿង ព្រោះតែខ្ញុំស្រឡាញ់ផ្នែកនេះខ្លាំង ហើយអ្វីដែលខ្ញុំកំពុងសិក្សា ផ្តោតខ្លាំងជាងគេបង្អស់ គឺផ្នែកដឹកនាំ និង ថត ដោយខ្ញុំកំពុងរៀនមើលពីតិចនិចបច្ចេកទេសនៃការថត ការចាប់ប្លង់ ការរើសទីតាំងឈុតឆាកថត ការដឹកនាំតួអង្គអ្វីអស់ទាំងនេះ»៕
