តី វាយមួយលុយ មិនភ្លេចគុណ មាស សុខសោភា ប្រកាសអរគុណក្តែងៗលើឆាក PMA 2023

កាលពីថ្ងៃទី ១៨ ខែមីនា ឆ្នាំ ២០២៣ កន្លងទៅ មហាជនអ្នកតាមដានទស្សនាការ Live កម្មវិធីប្រគល់ពានរង្វាន់ប្រចាំឆ្នាំ PMA 2023 ច្បាស់ជាបានជ្រាបហើយពីតារាប្រុសស្រីជាច្រើន ដែលបានទទួលពានរង្វាន់ពីកម្មវិធីដ៏ធំមួយនេះ។

ក្នុងចំណោមពានរង្វាន់ PMA 2023 ទាំង ១៤ ពានរង្វាន់ កញ្ញា តី ម្ចាស់បទ «តី វាយមួយលុយ» ក៏ទទួលបានពានរង្វាន់ចំនួន ១ ដែរ ដោយសិល្បការិនីរូបនេះឈ្នះពានរង្វាន់ «សិល្បករ-សិល្បការិនីថ្មី» ប្រចាំឆ្នាំ។

ជាការពិត នេះជាលើកទី ១ ហើយ ដែលកញ្ញា តី បានឈរឈ្មោះក្នុងកម្មវិធីប្រកួតខាងលើបន្ទាប់ពីបានបោះជំហានពីអ្នករាំ ក្លាយមកជាតារាចម្រៀងអាជីព ហើយក្នុងឆ្នាំ​ដំបូងរបស់ខ្លួន​ កញ្ញា តី ក៏ទទួលបានពានរង្វាន់ធ្វើឱ្យអ្នកគាំទ្ររំភើបចិត្តយ៉ាងខ្លាំងពីសមិទ្ធផល នៃការប្រឹងប្រែងរបស់នាង។

កញ្ញា តី បានធ្វើដំណើរឡើងលើឆាកទាំងស្រក់ទឹកភ្នែក ដោយក្តីរំភើបបានកាន់ពានរង្វាន់ និង មិនភ្លេចគុណឡើយដល់អ្នកមានគុណ ដូចជាអ្នកម្តាយ ព្រមទាំងក្រុមការងារ និង អ្នកគាំទ្រដែលជាអ្នកជំរុញឱ្យនាងមានមកដល់ថ្ងៃនេះ។ ជាពិសេសនោះ កញ្ញា តី បានស្រែកប្រកាសខ្លាំងៗលើឆាកអរគុណដល់ អ្នកនាង មាស សុខសោភា និង ស្វាមី គឺលោក រ៉ាដា ដែលជាបុគ្គលជួយដល់រូបនាង និង ជំរុញដល់រូបនាងកន្លងមកក្នុងវិស័យមួយនេះ បន្ទាប់ពីក្រុមគ្រួសារនាង។

គួររំឭកថា កញ្ញា តី គឺជាអ្នករាំរបស់អ្នកនាង មាស សុខសោភា ក្រោយមកដោយមានសមត្ថភាពលើការច្រៀង កញ្ញា តី ក៏បានបោះជំហានលើវិស័យចម្រៀង ដោយមានការណែនាំជ្រោមជ្រែងពី អ្នកនាង មាស សុខសោភា ជារៀមច្បងរហូតបានក្លាយទៅជាតារាចម្រៀងអាជីពក្នុងផលិតកម្មរាម៕