អ្នកគ្រូណាលី ផ្ដាំហើយផ្ដាំទៀត បើចង់ជោគជ័យ ដាច់ខាតកុំលាបពណ៌អ្នកដទៃ ព្រោះយុគ ៩ លាក់មិនជិតយូរទេ

កេរ្ដិ៍ឈ្មោះរបស់អ្នកគ្រូហុងស៊ុយ ណាលី កាន់តែល្បីល្បាញមានមហាជនស្គាល់ និង ជឿជាក់កាន់តែច្រើនបន្តបន្ទាប់ ខណៈអ្នកគ្រូបានចែករំលែកចំណេះដឹងល្អពាក់ព័ន្ធនឹងជីវិតប្រចាំថ្ងៃ ការរៀបផ្ទះសម្បែង ជំនាងផ្ទះ ធ្វើយ៉ាងណាឱ្យមានហុងស៊ុយល្អ ម្ចាស់ផ្ទះរកស៊ីមានបាន ជាពិសេសកន្លងមកអ្នកគ្រូក៏បានទស្សទាយពីអនាគតកាលរបស់ពិភពលោក ឱ្យមហាជនមានការប្រុងប្រយ័ត្ន និង ត្រៀមខ្លួនទុកជាមុនផងដែរ។

ក្រៅពីនោះ អ្នកគ្រូ ណាលី ក៏បានចែករំលែកជារឿយៗថា នៅក្នុងយុគ ៩ នេះ គឺជាយុគភ្លើង សូមឱ្យមនុស្សប្រព្រឹត្តអំពើល្អ កុំលាបពណ៌ កុំទម្លាក់កំហុសលើអ្នកដទៃ ទើបជីវិតភ្លឺស្វាង មានភាពជោគជ័យល្អប្រសើរ បើពុំដូច្នេះទេ នឹងត្រូវគេលាតត្រដាងពីទង្វើអាក្រក់ទាំងនោះមិនខាន។

ជាថ្មីម្ដងទៀត អ្នកគ្រូហុងស៊ុយដ៏ល្បីរូបនេះ បានចេញមុខបង្ហោះសារនៅលើគណនីហ្វេសប៊ុក ដាស់តឿនឱ្យមនុស្សសាងអំពើល្អជាថ្មី បើសិនជាចង់ជោគជ័យថា ៖ «បើចង់ជោគជ័យ កុំព្យាយាមលាបពណ៌ប្រឌិតរឿងទម្លាក់កំហុសលើអ្នកណាម្នាក់ ព្រោះយុគ 9 ជាយុគភ្លើង ដុតបំភ្លឺបង្ហាញសេចក្តីពិត អ្នកប្រឌិតរឿងមិនអាចលាក់បានយូរ ធ្វើតែអំពើល្អទៅ មនុស្សជាអ្នកធ្វើ ទេវតាអ្នកមើល»។

ការលើកឡើងរបស់អ្នកគ្រូ ណាលី ឃើញថាមានមហាជនជាច្រើន បានចូលទៅបញ្ចេញយោបល់គាំទ្រ និង បានចែករំលែកបទពិសោធផ្ទាល់ខ្លួនរបស់ពួកគេ គឺដូចអ្វីដែលអ្នកគ្រូ ណាលី កំពុងលើកឡើងពិតមែន៕