ចាំលោកគ្រូភ្លេង ប៉ា សុធី អ្នកនិពន្ធបទ «ទឹកហូរ» «ជិះដំរីជាមួយនឹងបង» ទេ? ពេលនេះលោកកំពុងសម្រាកនៅមន្ទីរពេទ្យរុស្ស៊ី

ថ្មីៗនេះ អ្នកនិយមស្តាប់បទចម្រៀងជំនាន់មុន ក៏ដូចជាសិល្បករ សិល្បការិនីជាច្រើនជំនាន់ កំពុងមានការភ្ញាក់ផ្អើលយ៉ាងខ្លាំង បន្ទាប់ពីទទួលបានដំណឹងសុខទុក្ខរបស់តារាចម្រៀងជំនាន់មុន ក៏ដូចជាអ្នកនិពន្ធទំនុកភ្លេង ទំនុកច្រៀង លោក ប៉ា សុធី កំពុងតែសម្រាកព្យាបាលនៅមន្ទីរពេទ្យរុស្ស៊ី។

មូលហេតុនៃការទទួលបានដំណឹងសុខទុក្ខរបស់លោកគ្រូ ប៉ា សុធី ដែលនៅក្នុងសិល្បៈគេស្គាល់ឈ្មោះថា លោក ឆៃ ឆាយា បន្ទាប់ពីតារាចម្រៀង ដួង វីរៈសិទ្ធ បានបង្ហោះរូបភាពទៅសួរសុខទុក្ខលោកគ្រូនៅឯមន្ទីរពេទ្យ។ ក្នុងនោះ ក្រោយពីឃើញការបង្ហោះរបស់លោក ដួង វីរៈសិទ្ធ ហើយនោះ ក៏មានវត្តមានរបស់តារាស្រីពហុជំនាញ ខាត់ សុឃីម ក៏បានទៅសួរសុខទុក្ខលោកគ្រូនៅឯមន្ទីរពេទ្យជាបន្តផងដែរ។

គួរជម្រាបថា ដំណឹងសុខភាពរបស់លោកគ្រូ ប៉ា សុធី នៅឯមន្ទីរពេទ្យរុស្ស៊ីនេះ បានធ្វើឱ្យមហាជន និង សិល្បករ សិល្បការិនីមានការភ្ញាក់ផ្អើលយ៉ាងខ្លាំង ព្រោះតែលោកគ្រូបានទៅរស់នៅឯសហរដ្ឋអាមេរិកជាច្រើនឆ្នាំហើយ។ ម្យ៉ាងវិញ ការវិលត្រឡប់មកកម្ពុជាលោកគ្រូក៏វិលមកយ៉ាងស្ងប់ស្ងាត ស្រាប់តែពេលទទួលដំណឹង គឺលោកគ្រូកំពុងសម្រាកនៅឯមន្ទីរពេទ្យ។

គួររំឭកថា លោកគ្រូ ប៉ា សុធី គឺជាតារាចម្រៀងជើងចាស់ និង ជាអ្នកនិពន្ធទំនុកភ្លេង ទំនុកច្រៀងមានឈ្មោះល្បីល្បាញមួយរូប ដោយឈ្មោះក្នុងវិស័យសិល្បៈរបស់លោកត្រូវបានគេស្គាល់ថា ឆៃ ឆាយា។ លោកគ្រូបាននិពន្ធបទចម្រៀងល្បីៗជាច្រើនកាលពីជំនាន់មុនដូចជាបទ «ម៉ាឌីសុន» បទ «នារី Sexy» បទ «រាត្រី​រនោច» បទ «មួយ​រាត្រី​នឹកតែអូន» បទ «ទឹកហូរ​» បទ «ជិះដំរីជាមួយនឹងបង» និង បទចម្រៀងជាច្រើនរយបទទៀត៕​