ចែកផ្លូវពី Best អ្នកកំលោះ Tong Tong កំពុងសាងក្តីសុខជាមួយនារីម្នាក់ជាដៃគូសម្ដែងថ្មី
គិតមកទល់ពេលនេះមានរយៈពេលជិត ១ ឆ្នាំហើយ ដែលតារាសម្ដែងប្រុស Tong Tong និង ស្រីស្រស់ Best Kamsing បានប្រកាសចែកផ្លូវគ្នា និង បន្សល់ទុកត្រឹមអនុស្សាវរីយ៍ល្អឱ្យគ្នា។ បន្ទាប់ពីផ្ដាច់ចំណងស្នេហ៍ទៅគេឃើញថាតារាស្រី Best បានផ្តើមទំនាក់ទំនងជាមួយហាយសូរម្នាក់ឈ្មោះថា Patrick តែពេលនេះពួកគេបានបញ្ចប់ទំនាក់ទំនងស្នេហ៍ទៀតបាត់ទៅហើយ។
យ៉ាងណាមិញ ងាកមកមើលអ្នកកំលោះ Tong Tong វិញ ក្រោយពីបែកផ្លូវគ្នានឹងអតីតសង្សារតារាសម្ដែងស្រី Best តារាប្រុសរូបសង្ហាសាច់សខ្ចីរូបនេះហាក់មិនទាន់មានដំរួយបង្កាត់ភ្លើងស្នេហ៍ថ្មីឡើយ ដោយរូបគេកំពុងតែផ្តោតលើការងារវិស័យសិល្បៈរបស់គេជាធំ ហើយជីវិតក៏ស្រស់បំព្រងផងដែរ។
តួយ៉ាង ខណៈនេះអ្នកកំលោះ Tong Tong កំពុងតែទទួលបានដៃគូសម្ដែងថ្មីដែលជាតារាស្រីមានរូបសម្រស់ស្រស់ស្អាត និង ពេញដោយទេពកោសល្យនោះគឺ Perth Veerinsara។ ជារឿយៗតារាប្រុស Tong Tong និង ស្រីស្អាត Perth តែងតែបង្ហាញភាពស្និទ្ធស្នាលគ្នាលើបណ្ដាញសង្គមអ៊ីនស្តាក្រាមមិនសូវជាដាច់ឡើយ រហូតនាំឱ្យមហាជននាំគ្នាបញ្ចេញមតិបង្អាប់ថែមទៀតផង ព្រោះអ្នកទាំងពីរសុទ្ធតែបេះដូងនៅទំនេរដូចគ្នា៕
