ក្រោយ WMO ថៃ ប្រកាសដកខ្សែក្រវ៉ាត់ និង មិនឱ្យលុយ ពេលនេះថ្នាក់ដឹកនាំជាតិសំខាន់ៗបានឧបត្ថម្ភប្រាក់ Thiago បន្តបន្ទាប់

កីឡាករប្រដាល់ប្រេស៊ីល Thiago Teixeira ត្រូវបានស្ថាប័នមួយថៃ ពិភពលោក ប្រកាសដកហូតខ្សែក្រវ៉ាត់ WMO World Title ដោយមិនឱ្យលុយថ្លៃប្រកួត និង បានហាមឃាត់លោកពីគ្រប់សកម្មភាពទាំងអស់ពាក់ព័ន្ធនឹង WMO ក្រោយពីការប្រកួតកាលពីថ្ងៃទី ១ ខែមេសា ឆ្នាំ ២០២៣ កន្លងទៅ ដែលលោកបានប្រកួតតំណាងឱ្យ «គុនខ្មែរ» នៅសង្វៀន Apex Fight Series របស់ប្រទេសអាល្លឺម៉ង់ និង បានទទួលជ័យជម្នះខ្សែក្រវ៉ាត់ WMO ពីការប្រកួតនោះ។

ពាក់ព័ន្ធជាមួយនឹងបញ្ហាមិនឱ្យលុយដល់កីឡាករប្រដាល់ Thiago នេះដែរ មានមហាជនជាច្រើនបានបង្ហាញការខឹងសម្បាមិនពេញចិត្តចំពោះ WMO ដែលធ្វើបែបនេះចំពោះកីឡាករប្រដាល់តំណាងឱ្យកម្ពុជា។ ដោយឡែក នៅព្រឹកថ្ងៃទី ៨ ខែមេសា ឆ្នាំ ២០២៣ នេះយោងតាមគណនីហ្វេសប៊ុកផ្ទាល់របស់ឯកឧត្ដម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានប្រកាសឱ្យពលរដ្ឋខ្មែរជួយផ្ដល់ជាលុយទៅកាន់កីឡាករប្រដាល់ Thiago Teixeira ផង ដោយឯកឧត្ដមផ្ទាល់បានឧបត្ថម្ភជាប្រាក់ចំនួន ១០០០ ដុល្លារដល់កីឡាកររូបនោះ។

ជាមួយគ្នានេះដែរ ក្នុងថ្ងៃដដែល ឧកញ៉ា ស្រី ចាន់ថន ក៏បានប្រកាសឧបត្ថម្ភទឹកប្រាក់ចំនួន ៣៥០០ ដុល្លារ ជូនដល់កីឡាករ Thiago ដោយលោកបានបញ្ជាក់បន្ថែមថា ៖ «លោកពិតជាសោកស្ដាយ និង អាណិតយ៉ាងខ្លាំង ដែលកីឡាករ Thiago មិនទទួលបានថវិការសម្រាប់ការប្រកួតចុងក្រោយ»។

ទន្ទឹមនឹងនេះ លោកជំទាវ ភឿង សកុណា រដ្ឋមន្រ្តីនៃក្រសួងវប្បធម៌ និង វិចិត្រសិល្បៈ ក៏បានប្រកាសផ្ដល់ថវិកាចំនួន ១០០០ ដុល្លារ ដល់កីឡាករប្រដាល់ប្រស៊ីល Thiago Teixeira ដែរ ដើម្បីលើកទឹកចិត្តចំពោះកីឡាកររូបនេះ ដែលបានជួយលើកតម្កើងតម្លៃនៃវប្បធម៌ខ្មែរ ផ្សព្វផ្សាយនៅលើឆាកជាតិ និង អន្តរជាតិ។

អ្វីដែលពិសេស សម្តេច ហុន សែន នាយករដ្ឋមន្រ្តីនៃព្រះរាជាណាចក្រកម្ពុជា​ ក៏បានផ្តល់ជូន Thiago ចំនួន ២០ ០០០ ដុល្លារ និង ថែមទាំងមានបំណងស្នើព្រះមហាក្សត្រ ផ្តល់សញ្ជាតិខ្មែរដល់ Thiago ថែមទៀតផង៕