កក្រើកហើយ! ស្អែកនេះកំពូលតារាលំដាប់ប្រទេសច្រើនដួងជួបគ្នាលើឆាកតែមួយនៅវិមានឈ្នះឈ្នះ
តាមរយៈគណនីហ្វេសប៊ុកផេក Beyond the Games បានបង្ហោះសារជូនដំណឹងថា នៅថ្ងៃទី ២៨ ខែមេសា ឆ្នាំ ២០២៣ ខាងមុខនេះ នៅឯវិមាន ឈ្នះ ឈ្នះ នឹងមានរៀបចំកម្មវិធី «Beyond the Games Day» ដើម្បីបង្ហាញភាសាបេះដូង។
យោងតាមសារបង្ហោះរបស់ផេកបានឱ្យដឹងថា កម្មវិធី «Beyond the Games Day» ដែលប្រព្រឹត្តទៅក្នុងគោលបំណងសាទរភាពជាម្ចាស់ផ្ទះរបស់កម្ពុជា ក្នុងព្រឹត្តិការណ៍កីឡាស៊ីហ្គេម លើកទី ៣២ និង អាស៊ានប៉ារ៉ាហ្គេម លើកទី ១២ និង បង្ហាញភាសាបេះដូងសម្រាប់កម្ពុជា តាមរយៈការស្រឡាញ់គាំទ្រអត្តពលិកខ្មែរគ្រប់រូប ប្រកបដោយមោទកភាពលើសពីការប្រកួត។ អ្វីដែលរិតតែអស្ចារ្យ កម្មវិធីនេះនឹងប្រព្រឹត្តទៅនៅថ្ងៃទី ២៨ ខែមេសា ឆ្នាំ ២០២៣ ខាងមុខ ចាប់ពីម៉ោង ៤ រសៀលតទៅ នៅឯបរិវេណវិមាន ឈ្នះ ឈ្នះ ដោយមានទាំងការប្រគំតន្រ្តី តាំងពិព័រណ៍គំនូរកុមារ គំនូរអាស៊ាន សួនបេះដូង និង ពិព័រណ៍ផលិតផល ជាដើម។ ជាពិសេសទៅទៀតនោះ គឺមានការអញ្ជើញចូលរួមពីកំពូលតារាចម្រៀងជួរមុខកម្ពុជាជាច្រើនរូបដូចជាលោក ព្រាប សុវត្ថិ ខេមរៈ សិរីមន្ដ វណ្ណដា មាស សុខសោភា តន់ ច័ន្ទសីម៉ា នីកូ ហ្សូណូ រ៉ាប៊ី ពេជ្រ សូលីកា និង សិល្បករក្នុងស្រុកល្បីៗជាច្រើនរូបទៀត ព្រមទាំងសិល្បករពីប្រទេសចំនួន ១១ មកសម្ដែងទៀតផង៕
ប្រភព និង រូបភាពដោយ ៖ Beyond the Games
