សម្ដេច ហ៊ុន សែន ណែនាំឱ្យរៀបចំបញ្ចាំងស្លាយផ្សាយបន្តផ្ទាល់ការប្រកួតបាល់ទាត់

នៅថ្ងៃទី ២៥ ខែមេសា ឆ្នាំ ២០២៣ នេះសម្ដេចតេជោ ហ៊ុន សែន បានបញ្ចេញសារសំឡេងតាមតេឡេក្រាមឆាណែល ផ្ទាល់ ឱ្យមានការបញ្ចាំងស្លាយផ្សាយបន្តផ្ទាល់ពីការប្រកួតបាល់ទាត់ព្រឹត្តិការណ៍ស៊ីហ្គេម ដើម្បីឱ្យប្រជាពលរដ្ឋទាំងអស់បានទស្សនា។

ជាក់ស្ដែង នៅក្នុងសារសំឡេងផ្ទាល់សម្ដេចបានមានប្រសាសន៍ថា ៖ «ដោយសារតែសាលប្រកួតរបស់យើងមានទំហំតូច ហើយអ្នកចង់ចូលមើលមានចំនួនច្រើន ទើបមានបងប្អូនសំណូមពរសមហេតុផលថា សុំឱ្យមានការដាក់បញ្ចាំងស្លាយ ផ្សាយបន្តផ្ទាល់ចេញពីការប្រកួតនៅពហុកីឡដ្ឋាន ដែលនឹងត្រូវប្រកួតជាបន្តបន្ទាប់ ទាំងនៅស្តាតអូឡាំពិក ក៏ដូចជានៅពហុកីឡដ្ឋានមរតកតេជោ»។

មិនតែប៉ុណ្ណោះ សម្ដេចបានបន្ថែមទៀតថា ៖ «ដូច្នេះ សូមឯកឧត្ដម លោកជំទាវ ជាពិសេសអភិបាលខេត្ត និង រាជធានីរៀបចំទីកន្លែងសមរម្យ ដើម្បីដាក់ស្លាយបញ្ចាំងឱ្យពលរដ្ឋបានមើល ហើយរៀបចំឱ្យបានឆាប់បំផុត ដើម្បីធានាថាបងប្អូនអាចមានលទ្ធភាពមើល ដោយមានការជួបជុំមួយត្រឹមត្រូវ ហើយការពារសណ្ដាប់ធ្នាប់ឱ្យបានល្អ»៕