ស្អាតឆ្លាតពូកែ! រៀនចប់ពេទ្យពីបរទេសភ្លាម ឈឿង លីណា ត្រឡប់មកកម្ពុជាវិញ ដើម្បីចូលប្រកួតស៊ីហ្គេមដណ្ដើមមេដាយជូនជាតិ

ម្ចាស់មេដាយសំរឹទ្ធ នៅប្រទេសមីយ៉ានម៉ា កាលពីឆ្នាំ ២០១៣ កញ្ញា ឈឿង លីណា ដែលជាកីឡាការនីតេក្វាន់ដូកម្ពុជាជើងចាស់ទើបបញ្ចប់ការសិក្សាផ្នែកវេជ្ជសាស្រ្តពីសាកលវិទ្យាល័យមួយនៅប្រទេសវៀតណាម អស់រយៈពេល ៥ ឆ្នាំ ដោយបានត្រឡប់មកកម្ពុជា ដើម្បីចូលរួមប្រកួតកីឡាតេក្វាន់ដូ ក្នុងព្រឹត្តិការណ៍ស៊ីហ្គេម លើកទី ៣២ ឆ្នាំ ២០២៣ ។

កញ្ញា ឈឿង លីណា មានអាយុ ២៨ ឆ្នាំ ធ្លាប់ចូលរួមប្រកួតនៅស៊ីហ្គេមលើកទី ២៧ នៅមីយ៉ាន់ម៉ា ក្នុងឆ្នាំ ២០១៣ ដោយដណ្ដើមបានមេដាយសំរឹទ្ធមួយគ្រឿង និង បានផ្អាកប្រកួត ក្រោយពីបានចូលរួមប្រកួតនៅស៊ីហ្គេម លើកទី ២៩ ដើម្បីផ្ដោតការសិក្សា។ មិនត្រឹមតែបានចូលប្រកួតក្នុងព្រឹត្តិការណ៍ស៊ីហ្គេមតំណាងឱ្យកម្ពុជាប៉ុណ្ណោះទេ ប៉ុន្តែ ឈឿង លីណា ក៏ធ្លាប់បានចូលរួមការប្រកួតកម្រិតពិភពលោកនៅឯប្រទេសកូរ៉េខាងត្បូងផងដែរ។

យ៉ាងណាមិញ នាពេលថ្មីៗនេះនៅក្នុងបណ្ដាញសង្គមហ្វេសប៊ុករបស់កញ្ញា ឈឿង លីណា បានសរសេរសារបង្ហោះថា ៖ «ខ្ញុំបានត្រៀមខ្លួនរួចរាល់ហើយ សម្រាប់ការប្រកួតប្រជែង សង្ឃឹមថាខ្ញុំនឹងធ្វើបានល្អសម្រាប់ប្រទេសជាតិខ្ញុំ»៕