អ៊េមអស់ស្ទះ! អ្នកចូលរួមព្រឹត្តិការណ៍ស៊ីហ្គេម មានអ៊ីនធឺណេតល្បឿនលឿនប្រើ Free តាមទីតាំង ១៨៦ នេះ

យោងតាមការបង្ហោះសាររបស់ក្រសួងប្រៃសណីយ៍ និង ទូរគមនាគមន៍ បានឱ្យដឹងថា នៅក្នុងព្រឹត្តិការណ៍ស៊ីហ្គេម លើកទី ៣២ នេះ ប្រជាពលរដ្ឋទាំងអស់អាចប្រើប្រាស់ WiFi សាធារណៈដោយឥតគិតថ្លៃ នៅពហុកីឡដ្ឋានជាតិទាំងពីរ ចំនួន ១៨៦ ទីតាំង។

ក្រសួងប្រៃសណីយ៍ និង ទូរគមនាគមន៍ បានបញ្ជាក់ថា ដើម្បីចួលរួមគាំទ្រដល់ព្រឹត្តិការណ៍ស៊ីហ្គេមលើកទី ៣២ និង អាស៊ានប៉ារ៉ាហ្គេមលើកទី ១២ ដែលកម្ពុជា ធ្វើជាម្ចាស់ផ្ទះក្នុងឆ្នាំ ២០២៣ នេះ ប្រព្រឹត្តទៅកាន់តែអស្ចារ្យ និង សប្បាយរីករាយ ក្រសួងប្រៃសណីយ៍ និង ទូរគមនាគមន៍ បានសហការជាមួយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី ៣២ និង អាស៊ានប៉ារ៉ាហ្គេម លើកទី ១២ ឆ្នាំ ២០២៣ ផ្តល់ជូនការប្រើប្រាស់សេវាអ៊ីនធឺណិត ល្បឿនលឿនដោយឥតគិតថ្លៃ នៅពហុកីឡដ្ឋានជាតិអូឡាំពិក និង ពហុកីឡដ្ឋានជាតិមរតកតេជោ ចំនួន ១៨៦ ទីតាំងរួមមាន៖

• សាលក្នុងពហុកីឡាដា្ឋន (Indoor Hall)

• សាលទស្សនិកជន VIP (VIP Audiences)

• សាលទស្សនិកជនខាងក្រៅ (Outdoor Audiences)

• វិមានកីឡដ្ឋាន

• មណ្ឌលកីឡាហែលទឹក

• មណ្ឌលកីឡាហុកគី

• មណ្ឌលកីឡាក្នុងសាល

• មណ្ឌលកីឡាវាយសី និងវាយកូនឃ្លីលើតុ

• មណ្ឌលកីឡាវាយកូនបាល់

• សាលហាត់កីឡាប្រយុទ្ធ

• និង តំបន់សាធារណៈខាងក្រៅពហុកីឡដ្ឋាន

គួរបញ្ជាក់ដែរថា ដើម្បីប្រើប្រាស់ WiFi សាធារណៈ ដែលដាក់ជូនដោយក្រសួងប្រៃសណីយ៍ និង ទូរគមនាគមន៍ អ្នកចូលរួមទាំងអស់ត្រូវស្កេន QR Code ក្នុងរូបខាងក្រោមនេះ ឬផ្ទាំងរូបភាពបង្ហាញនៅតាមទីតាំងជាក់ស្ដែង ដែលបានកំណត់ ដើម្បីភ្ជាប់ WiFi ។ កម្ពុជា នឹងបើកការប្រកួតកីឡាអាស៊ីអាគ្នេយ៍ លើកទី ៣២ ចាប់ពីថ្ងៃទី ៥ ខែឧសភា ដល់ថ្ងៃទី ១៧ ខែឧសភា ឆ្នាំ ២០២៣ និង រៀបចំការប្រកួតកីឡាអាស៊ានប៉ារ៉ាហ្គេមលើកទី ១២ ចាប់ពីថ្ងៃទី ៣ ដល់ថ្ងៃទី ៩ ខែមិថុនា ឆ្នាំ ២០២៣ ខាងមុខនេះ៕