រំភើបណាស់! កុំភ្លេចពាក់អាវពណ៌ខៀវឱ្យស្រុះគ្នា ស្រែកហ៊ោគាំទ្រក្រុមជម្រើសជាតិកម្ពុជា «គោព្រៃជំទង់» យើងយប់នេះ!

នៅយប់ថ្ងៃទី ២ ខែឧសភា ឆ្នាំ ២០២៣ នេះ ក្រុមជម្រើសជាតិកម្ពុជា នឹងត្រូវប៉ះគ្នាជាមួយក្រុមជម្រើសជាតិហ្វីលីពីន ក្នុងជំនួបពូល A នៃព្រឹត្តិការណ៍កីឡាស៊ីហ្គេម លើកទី ៣២ ឆ្នាំ ២០២៣ លើវិញ្ញាសាបាល់ទាត់បុរសក្រោមអាយុ ២២ ឆ្នាំ។

សម្រាប់ការប៉ះគ្នាជាមួយក្រុមជម្រើសជាតិហ្វីលីពីនយប់នេះ សហព័ន្ធកីឡាបាល់ទាត់កម្ពុជាបានប្រកាសថា ក្រុមជម្រើសជាតិកម្ពុជា នឹងប្រើប្រាស់ឯណ្ឋានអាវពណ៌ខៀវ ហេតុដូចនេះសង្ឃឹមថាបងប្អូនដែលចូលរួម ជាពិសេសអ្នកដែលទៅទស្សនាផ្ទាល់ នឹងប្រើប្រាស់អាវជម្រើសជាតិកម្ពុជាពណ៌ខៀ​វ ឬ អាវដែលមានពណ៌ខៀវ ដើម្បីជាការលើកទឹកចិត្ត និង គាំទ្រក្រុមជម្រើសជាតិយើង។

គួរបញ្ជាក់ឱ្យដឹងដែរថា ការប្រកួតវិញ្ញាសាបាល់ទាត់បុរសក្រោមអាយុ ២២ ឆ្នាំ កម្ពុជា ប៉ះគ្នាជាមួយហ្វីលីពីនយប់នេះ គឺនឹងធ្វើឡើងនៅម៉ោង ៧ និង ០០ នាទីយប់តទៅ នៅពហុកីឡដ្ឋានជាតិអូឡាំពិក៕