(វីដេអូ) អស្ចារ្យណាស់! ការពិតប្អូនប្រុសរបស់ រ៉េត សារីតា ជាកីឡាករគុនល្បុក្កត្តោល្បីឈ្មោះ និង ត្រៀមសម្ដែងក្នុងថ្ងៃបើកព្រឹត្តិការណ៍ស៊ីហ្គេម

មហាជនអ្នកគាំទ្រ Miss Universe Cambodia 2020 កញ្ញា រ៉េត សារីតា មួយចំនួនច្បាស់ជាធ្លាប់បានដឹងខ្លះមកហើយ ពីជីវិតឯកជនរបស់កញ្ញា ពោលគឺពីជីវិតគ្រួសាររបស់តារាស្រីរូបនេះ។ ក្នុងនោះ កញ្ញា រ៉េត សារីតា គឺជាកូនស្រីច្បង ក្នុងចំណោមបងប្អូន ៤ នាក់ ដោយ​​មានស្រី ៣ នាក់ និង ប្រុស ១ នាក់។

ក្នុងនោះដែរ ក្រឡេកទៅមើលប្អូនប្រុសទី ៣ របស់កញ្ញា រ៉េត សារីតា ដែលមានឈ្មោះថា រ៉េត វិសុថាន់ ឯណោះវិញ ក៏មានដុងសិល្បៈមិនចាញ់បងនោះឡើយ ដោយលោក រ៉េត វិសុថាន់ ក៏ជាតារាសម្តែងធ្លាប់បានបង្ហាញខ្លួនក្នុងខ្សែភាពយន្តជាច្រើនរួមមានរឿង «The Flag» និង រឿង «ឧក្រិដ្ឋជន» ជាដើម។ ភាគច្រើន រឿងដែលប្អូនប្រុសទី ៣ របស់កញ្ញា រ៉េត សារីតា បានសម្តែង គឺជាសាច់រឿងបែបវាយ ប្រយុទ្ធ ក៏ព្រោះតែលោក រ៉េត វិសុថាន់ គឺជាកីឡាករគុនល្បុក្កត្តោ និង ជាអ្នកសម្តែងក្បាច់គុនល្បុក្កត្តោដ៏មានថ្វីដៃទៀតផង។

កន្លងមក ក្រៅពីការសម្តែង និង ប្រកួត លោក រ៉េត វិសុថាន់ ក៏ធ្លាប់បានបង្ហាញការសម្តែងក្បាច់គុនល្បុក្កត្តោក្នុងព្រឹត្តិការណ៍ធំៗរបស់ជាតិជាច្រើនទៀតផង។ លើសពីនោះ ក្នុងថ្ងៃបើកព្រឹត្តិការណ៍ស៊ីហ្គេមលើកទី ៣២ និង អាស៊ានប៉ារ៉ាហ្គេមលើកទី ១២ លោក រ៉េត វិសុថាន់ ក៏ត្រៀមបង្ហាញឈុតឆាកដ៏អស្ចារ្យក្នុងនាមជាម្ចាស់ផ្ទះផងដែរ៕