ប្រយ័ត្នអស់! ចង់មើលបាល់ទះកម្ពុជាប៉ះឥណ្ឌូនេស៊ី សូមទៅយកសំបុត្រល្ងាចនេះ នៅទីតាំងមួយនេះ

សហព័ន្ធកីឡាបាល់ទះកម្ពុជា នៅរសៀលថ្ងៃទី ០៥ ខែឧសភា ឆ្នាំ ២០២៣ នេះ បានបញ្ចាក់ឱ្យបានដឹងថា ចំពោះការប្រកួតកីឡាបាល់ទះក្នុងសាល វិញ្ញាសាបុរស នៅថ្ងៃទី ០៦ ខែឧសភា ឆ្នាំ ២០២៣ នៅវិមានកីឡាបាល់ទះ នៃពហុកីឡដ្ឋានជាតិអូឡាំពិក បងប្អូនអាចទៅយកសំបុត្រឥតគិតថ្លៃបាន នៅពហុកីឡដ្ឋានជាតិអូឡាំពិក នៅថ្ងៃទី ០៥ ខែឧសភា ឆ្នាំ ២០២៣ ចាប់ពីវេលាម៉ោង ១៧.០០ នាទី ហូតដល់អស់សំបុត្រ។

សូមបញ្ជាក់ផងដែរថា នៅថ្ងៃទី ០៦ ខែឧសភា ឆ្នាំ ២០២៣ ស្អែកនេះ ក្រុមបាល់ទះបុរសជម្រើសជាតិកម្ពុជា និង ត្រូវប៉ះជាមួយក្រុមបាល់ទះបុរសជម្រើសជាតិឥណ្ឌូនេស៊ី ខណៈក្រុមទាំង ២ នេះ មាន ៦ ពិន្ទុដូចគ្នា ក្នុងតារាង A។

ដោយឡែក កាលពីថ្ងៃទី ០៣ ខែឧសភា ឆ្នាំ ២០២៣ កន្លងទៅ ក្រុមបាល់ទះបុរសជម្រើសជាតិកម្ពុជា បានយកឈ្នះក្រុមបាល់ទះបុរសជម្រើសជាតិសិង្ហបុរី ជាមួយលទ្ធផល ៣ សិត ទល់នឹង ០ យ៉ាងអស្ចារ្យ។ បន្ទាប់មក នៅថ្ងៃទី ០៤ ខែឧសភា ឆ្នាំ ២០២៣ ក្រុមបាល់ទះបុរសជម្រើសជាតិកម្ពុជា បានលត់ក្រុមបាល់ទះបុរសជម្រើសជាតិហ្វីលីពីន ៣ សិត ទល់ ០ ទៀត ហើយបានកក់កៅអីឡើងទៅវគ្គពាក់កណ្ដាលផ្ដាច់ព្រ័ត្រ ដើម្បីដណ្ដើមយកមេដាយមាស ក្នុងព្រឹត្តិការណ៍កីឡាស៊ីហ្គេម ២០២៣ វិញ្ញាសាបាល់ទះបុរស៕