រំភើបណាស់! បាល់បោះរទេះនារីកម្ពុជា ឈ្នះមេដាយមាសបានសម្រេច ក្នុងព្រឹត្តិការណ៍អាស៊ានប៉ារ៉ាហ្គេមលើកទី ១២

នៅថ្ងៃទី ៣ ខែមិថុនា ឆ្នាំ ២០២៣ នេះ ហ្វេសប៊ុកផេកផ្លូវការរបស់ព្រឹត្តិការណ៍ស៊ីហ្គេម លើកទី ៣២ និង អាស៊ានប៉ារ៉ាហ្គេម លើកទី ១២ បានបង្ហោះសារថា កម្ពុជាបានទទួលមេដាយមាសទី ១ ពីការប្រកួតកីឡាអាស៊ានប៉ារ៉ាហ្គេម លើកទី ១២ ក្នុងវិញ្ញាសាក្រុមបាល់បោះជិះរទេះជនពិការនារី ៣ នាក់ទល់ ៣ នាក់។

ជាក់ស្ដែង នៅក្នុងការប្រកួតនាព្រឹកថ្ងៃទី ៣ ខែមិថុនា ឆ្នាំ ២០២៣ នៅឯពហុកីឡដ្ឋានជាតិមរតកតេជោនេះ ក្រុមម្ចាស់ផ្ទះកម្ពុជា ក្រុមបាល់បោះជិះរទេះជនពិការនារីបានដណ្ដើមមេដាយមាសដំបូងគេ ក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី ១២ ឆ្នាំ ២០២៣ ក្រោយយកឈ្នះនារីថៃ ក្នុងលទ្ធផល ១១-៩ ។

គួរបញ្ជាក់ដែរថា នេះជាមេដាយមាសដំបូង ក្នុងព្រឹត្តិការណ៍អាស៊ានប៉ារ៉ាហ្គេម លើកទី ១២ ដែលកម្ពុជាទទួលបាន និង ជាការការពារមេដាយមាសបានសម្រេចរបស់កម្ពុជា ក្រោយពីបានទទួលមេដាយមាសនៅអាស៊ានប៉ារ៉ាហ្គេម លើកទី ១១ នៅឥណ្ឌូនេស៊ី កាលពីឆ្នាំ ២០២២ កន្លងទៅ៕

រូបភាពដោយ ៖ Fresh News និង Cambodia 2023