ដំណឹងល្អអ្នកស្រុកព្រៃឈរ បន្តិចទៀតក្រុមហ៊ុន SUN AWESOME ទៅបង្កើតរោងចក្រកាត់ដេរដល់ទីនោះ
នៅក្នុងពេលឆាប់ៗខាងមុខនេះ ប្រជាពលរដ្ឋនៅក្នុងស្រុកព្រៃឈរ ខេត្តកំពង់ចាម មិនខ្វះការងារធ្វើនោះទេ ព្រោះគណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា( CDC )ទើបតែសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុន SUN AWESOME GARMENT CO., LTD.” ដែលមានគម្រោងបង្កើតរោងចក្រកាត់ដេរសម្លៀកបំពាក់ និង បោកគក់នៅទីនោះ ។
បើតាមក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្រុមហ៊ុន “SUN AWESOME GARMENT CO., LTD.” មានគម្រោងបង្កើតរោងចក្រកាត់ដេរសម្លៀកបំពាក់ និង បោកគក់ ដែលមានទីតាំងវិនិយោគស្ថិតនៅក្នុងភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម ដែលមានទុនវិនិយោគប្រមាណជា ៦,៩លានដុល្លារអាមេរិក និង អាចបង្កើតការងារជូនពលរដ្ឋធ្វើបានចំនួន ៦១០នាក់ ៕
