សំខាន់ណាស់! បាក់ឌុបជិតដល់ហើយ បើមិនព្រមធ្វើរឿង ៥ យ៉ាងនេះទេ ប្រយ័ត្នធ្លាក់!

ការប្រឡងមធ្យមសិក្សាទុតិយភូមិ គឺអាចនិយាយបានថាជាដំណាក់កាលដ៏សំខាន់បំផុតក្នុងជីវិតអ្នកសិក្សាដើម្បីអាចបន្តទៅកាន់ថ្នាក់ឧត្ដមសិក្សា ។ មុនការប្រឡងមកដល់បេក្ខជនគ្រប់រូបត្រូវត្រៀមខ្លួនឱ្យបានជាមុនឱ្យបានល្អ ទើបអាចឆ្លងផុតនូវដំណាក់កាលដ៏តឹងតែងនេះ ។ ដូច្នេះក្នុងអំឡុងមុនការប្រឡងបាក់ឌុបជិតមកដល់នេះតើប្អូនៗទី ១២ ត្រូវត្រៀមអ្វីខ្លះនោះ?

១.ការរំលឹកមេរៀនឡើងវិញនៅត្រង់ចំណុចសំខាន់ៗ

គួរយកមេរៀនមករំលឹកឡើងវិញទាំងអស់តាំងដើមដើមឆ្នាំដល់ចុងឆ្នាំ ។ ដើម្បី​ឱ្យការរំលឹកមេរៀននេះមានប្រសិទ្ធភាពគួរតែធ្វើការសង្ខេបនូវចំណុចគោលនៃមេរៀននីមួយៗទើបងាយស្រួលចងចាំ ។

២.ព្យាយាមអនុវត្តលំហាត់ឡើងវិញឱ្យបានស្ទាត់ជំនាញ

លំហាត់នៅក្នុងមេរៀនគីមីវិទ្យា រូបវិទ្យា ជីវវិទ្យា ពិសេសគឺគណិតវិទ្យានោះ គួរចាប់ផ្ដើមយកមកអនុវត្តហ្វឹកហាត់ឱ្យស្ទាត់ជំនាញទៅប្រភេទលំហាត់ និងតាមមេរៀននីមួយៗ ។ ពិសេសគួរតែចងក្រងនូវរូបមន្តសំខាន់ៗទុកដើម្បីងាយចងចាំ នៅពេលប្រឡងប៉ះចំលំហាត់ណាមួយនោះយើងនឹងដឹងថាគួរយករូបមន្តមួយណាមកដោះស្រាយ ។

៣.យកវិញ្ញាសាឆ្នាំមុនៗមកសាកល្បងអនុវត្ត​

នេះក៏ជាចំណុចសំខាន់មួយដែរដើម្បីអាចវាស់ស្ទង់កម្រិតសមត្ថភាពរបស់ខ្លួនឯង ។ គួរយកវិញ្ញាសាចាស់ៗមកអនុវត្តសាកមើល ប្រសិនបើយើងអាចដោះស្រាយបានមានន័យថា យើងមានសមត្ថភាពនឹងអាចប្រឡងថ្នាក់ជាតិមួយនេះបានយ៉ាងល្អ ប៉ុន្តែប្រសិនបើមិនអាចធ្វើបានត្រូវរកចំណុចខ្សោយរបស់ខ្លួនឯងឱ្យឃើញថាមកពីមូលហេតុអ្វី ហើយទៅរៀនសារឡើងវិញ ។

៤.ជួបជុំមិត្តភក្ដិធ្វើស្វ័យសិក្សា

ត្រង់នេះក៏មិនគួរមើលរំលងឡើយ​ពេលខ្លះយើងរៀនតែម្នាក់ឯង មិនដឹងថាខ្លួនឯងចេះអ្វីស្ទើរអ្វីនោះទេ ប៉ុន្តែបើបានជុំមិត្តភក្ដិយើងអាចធ្វើការចែករំលែកគ្នាទៅវិញទៅមក ហើយអាចសួរត្រង់ណាដែលយើងមិនយល់ ។

៥.ការតាមដាននូវរាល់សេចក្ដីប្រកាសទាំងឡាយរបស់ក្រសួងអប់រំ

ក្រសួងអប់រំ យុវជន និងកីឡា គឺជាប្រភពព័ត៌មានដ៏សំខាន់បំផុតមិនត្រូវធ្វេសប្រហែស រាល់ការប្រកាសទាំងឡាយគឺតែងចេញពីប្រភពក្រសួងមុនគេបង្អស់ ពិសេសក្រសួងក៏តែងបង្ហោះនូវរាល់វិញ្ញាសាចាស់ៗ វីដេអូបង្រៀនល្អៗ និងរាល់សេចក្ដីណែនាំផ្សេងៗទៀតសុទ្ធតែមានសារៈសំខាន់ ៕