៥ មុខជំនាញនេះ សម្បូរនិស្សិតកម្ពុជារៀនច្រើនបំផុត ល្បីចេញធ្វើការប្រាក់ខែខ្ពស់ៗណាស់

បវេសនកាលថ្មី នៃការសិក្សាថ្នាក់បរិញ្ញាប័ត្រ កំពុងឈានចូលមកដល់បណ្ដើរៗហើយ តើប្អូនៗដែលទើបតែជាប់សញ្ញាប័ត្របាក់ឌុប ក៏ដូចជាអ្នកចង់ចាប់់យកជំនាញថ្មី បានជ្រើសរើសជំនាញសិក្សាហើយ ឬនៅ ? ព្រោះថាមុខជំនាញសិក្សា គឺពិតជាសំខាន់ណាស់ បើកាលណាយើងរើសជំនាញត្រូវទីផ្សារ វានឹងផ្ដល់ភាពងាយស្រួលក្នុងការរកការងារបានឆាប់រហ័ស ហើយបើរើសជំនាញដែលពុំសូវត្រូវប៉ាន់នៅក្នុងទីផ្សារអាចនឹងនាំឱ្យយើងពិបាកក្នុងការររកការងារ ។ ដូច្នេះហើយថ្ងៃនេះ យើងសូមណែនាំនូវ មុខជំនាញចំនួន ៥ ដែលគេនិយមសិក្សា ងាយស្រួលរកការងារ  ៖

១. មុខជំនាញគណនេយ្យ

មុខជំនាញគណនេយ្យ ជាមុខជំនាញដែលសិស្សក្រោយចប់វិទ្យាល័យ ភាគច្រើននិយមចាប់យកជំនាញនេះ ដោយសារវាជាជំនាញដែលងាយស្រួលរកការងារធ្វើបំផុត ព្រោះថានៅកម្ពុជាយើងសព្វថ្ងៃ សម្បូរទៅដោយ ធនាគារ គ្រឹស្ថានហិរញ្ញវត្ថុ ជាច្រើន ដែលកំពុងតែត្រូវការជ្រើសរើសបុគ្គលិកជាបន្តបន្ទាប់ ឱ្យចូលបម្រើការងារក្នុងវិស័យមួយនេះ ។ មិនតែប៉ុណ្ណោះ សាលាដែលគេនិយមរៀនទៅលើមុខជំនាញនេះមានដូចជា វិទ្យាស្ថានវ៉ាន់ដាគណនេយ្យ សាកលវិទ្យាល័យអាស៊ីអឺរ៉ុប វិទ្យាស្ថានជាតិពាណិជ្ជសាស្ត្រ និង សាកលវិទ្យាល័យជាតិគ្រប់គ្រងជាដើម ។

២. មុខជំនាញវិស្វករ ឬ វិស្វកម្មសំណង់ស៊ីវិល

សព្វថ្ងៃនេះ នៅកម្ពុជាយើង ហេដ្ឋារចនាសម្ព័ន្ធ សំណង់អគារ បុរី ផ្ទះល្វែង កំពុងរីកដុះដាលដូចផ្សិត ដូច្នេះបើសិនជាអ្នក ចាប់យកជំនាញវិស្វកម្មសំណង់ស៊ីវិល ធានាថាក្រោយរៀនចប់មិនខ្វះទីផ្សារការងារនោះឡើយ ។ មិនត្រឹមតែប៉ុណ្ណោះបើនិយាយពីប្រាក់ចំណូលវិញគឺគិតចូលជាគម្រោងតែម្ដង ហើយបើគិតជាខែវិញ គឺអាចរកបានដល់ខ្ទង់ពាន់ឯណោះ ។ គួរបញ្ជាក់ផងដែរថា មុខជំនាញនេះគេនិយមសិក្សានៅ សាកលវិទ្យាល័យន័រតុន , វិទ្យាស្ថានបច្ចេកវិទ្យាកម្ពុជា ជាដើម ។

៣. មុខជំនាញពេទ្យ

មិនថា ទន្តពេទ្យ ឆ្មប ឱសថការី សុទ្ធតែជាមុខជំនាញដែលគេនិយមជ្រើសយកក្រោយចប់វិទ្យាល័យ ព្រោះនេះជាជំនាញដែលសំខាន់ នឹងមានតម្លៃណាស់សម្រាប់សង្គមជាតិ នឹង មនុស្សជាតិ ព្រោះអាចជួយសង្គ្រោះជីវិតមនុស្សបាន ។ ក្រោយពេលសិក្សា អ្នកអាចប្រឡងចូលបំពេញការងារបម្រើឱ្យមន្ទីរពេទ្យរដ្ឋ ឬឯកជនបាន ហើយបើមានសម្ថភាព នឹងលទ្ធភាព អាចបើកជា មន្ទីរសម្រាកព្យាបាល ឱសថស្ថានបានទៀតផង ។ គួរបញ្ជាក់ផងដែរថា មុខជំនាញនេះគេនិយមសិក្សានៅ សាកលវិទ្យាល័យវិទ្យាសាស្ត្រសុខាភិបាល , សាកលវិទ្យាល័យពុទ្ធិសាស្ត្រ, និងសាកលវិទ្យាល័យចេនឡាជាដើម ។

៤. មុខជំនាញ Graphic Design

សព្វថ្ងៃនេះ ជំនាញក្រាហ្វិកឌីស្សាញត្រូវបានយុវវ័យ ជាបុរសៗនិយមរៀនណាស់ ដោយសារវាជាមុខជំនាញដែលពុំមានលក្ខណៈរត់ការស្មុគស្មាញដូចជំនាញផ្សេងៗ មិនតែប៉ុណ្ណោះ មុខជំនាញនេះ គេកំពុងត្រូវប៉ាន់ក្នុងទីផ្សា ព្រោះក្នុងស្ថាប័នណាក៏ដោយ មិនថា ស្ថាប័នរដ្ឋ ស្ថាប័នឯកជន សុទ្ធតែត្រូវការអ្នកឌីស្សាញ មិនតែប៉ុណ្ណោះបើនិយាយពីប្រាក់ចំណូលវិញ គឺជាមធ្យមចាប់ពី៤៥០ដុល្លាឡើងទៅដល់ខ្ទង់ពាន់ឯណោះ ។ គួរបញ្ជាក់ផងដែរថា សាលាដែលគួរសិក្សាជំនាញនេះមានដូចជា វិទ្យាស្ថានស៊ីតិក, សាកលវិទ្យាល័យលីមកុកវីងជាដើម ។

៥. មុខជំនាញ អក្សរសាស្ត្រអង់គ្លេស

អក្សរសាស្រ្តអង់គ្លេស ជាមុខជំនាញដែលគេពេញនិយមរៀនបំផុតមិនថាសិស្សទើបចប់បាក់ឌុប ឬក៏អ្នកទើបតែចប់ជំនាញផ្សេងនោះទេ នេះគឺដោយសារតែមុខជំនាញនេះ មានទីផ្សារការងារខ្ពស់ និងប្រាក់ខែសមស្រប ព្រោះក្រោយពេលបញ្ចប់ការសិក្សាទៅ អ្នកអាចបម្រើការងារបានមិនថា ស្ថាប័នរដ្ឋ ឬស្ថាប័នឯកជនឡើយ មិនតែប៉ុណ្ណោះអ្នកអាចធ្វើជា អ្នកបកប្រែឯកសារ អ្នកបកប្រែផ្ទាល់ គ្រូបង្រៀន ជាដើម ។ គួរបញ្ជាក់ផងដែរ សាលាដែលគេនិយមសិក្សាទៅលើមុខជំនាញនេះមានដូចជា វិទ្យាស្ថានភាសាបរទេស IFL , សាកលវិទ្យាល័យបញ្ញាសាស្ត្រ និង សាកលវិទ្យាល័យជាតិគ្រប់គ្រងជាដើម ៕