ដំណាំតកូនតចៅ! មានដីកុំទុកឱ្យទំនេរ ដាំដូងក្រអូបចំណាយតែដំបូង ៣ ឆ្នាំក្រោយកើបលុយខ្ទង់ម៉ឺនដុល្លារ ១ ឆ្នាំៗ

សម្រាប់បងប្អូនដែលមានដីច្រើនហើយមិនដឹងចាប់របរអ្វី ឬ ដាំដំណាំអ្វី គឺអាចងាកមកដាំដូងក្រអូប ព្រោះកំពុងពេញនិយម ហើយរបរនេះដាំវាលំបាក និង ហត់តែម្តងទេ តែផ្តល់ផលចំណូលរាប់សិបឆ្នាំគឺចំណូលបានតកូនតចៅ ។

បើតាមលោក វ៉ាន់ ថាន ផ្នែកលក់នៃកសិកម្មហ្រ្គីនហ្វាម បានឱ្យដឹងថា បច្ចុប្បន្នប្រជាពលរដ្ឋដែលមានផ្ទៃដីធំគេនិយមដាំដូង ព្រោះយល់ថាជាដំណាំដែលមានអាយុវែងចំណាយដើមទុនពីដំបូងច្រើនមែន តែ ៤ ឆ្នាំ ក្រោយបានទទួលផលជាផ្លែដូងរហូតតកូនគឺរាប់សិបឆ្នាំឯណោះ ហើយអ្នកខ្លះគេដាំដូងដើម្បីគាស់ដើមលក់ឱ្យគេយកទៅដាំតាមបុរី តាមវីឡា ឬ តាមសួនច្បារ… ជាដើម ។

ជាក់ស្តែងមានអតិថិជនពីគ្រប់ខេត្តបានទាក់ទងទិញពូជដូងក្រអូបយកទៅដាំក្នុងចំការរបស់គេ ព្រោះតែពូជដូងនេះឆាប់ហុចផលត្រឹម ៣ ឆ្នាំ ចេញផ្កាផ្លែហើយ ។ បន្ទាប់មកក៏មានអ្នកនិយមដាំដូងតឿ ដូងតុកកែ ដូងខ្ទិះ… ផងដែរ ។

បើតាមលោក បុត្រ គឹមឆាយ ម្ចាស់ចំការដូងក្រអូបវាលរេញបង្ហាញតាមរយៈសារជាសំឡេងក្នុងបណ្តាញសង្គមហ្វេសប៊ុកនាពេលកន្លងមកថា៖ «សម្រាប់ប្រជាពលរដ្ឋដែលមានផ្ទៃដី ១ ហិកតា អាចដាំដូងក្រអូបបាន ៤០០ ដើម ប្រសិនបើដាំ ៥ ម៉ែត្រមួយ ប៉ុន្តែបើសិនជាដាំ ៦ ម៉ែត្រមួយ ផ្ទៃដី ១ ហិកតា អាចដាំបាន ២២២ ដើម ជាមួយថវិកាចន្លោះពី ១៥០០ ទៅ ២០០០ ដុល្លារ ។

ចំពោះកសិករមានដីតូចហើយចង់ដាំដូងដែរ ចាំបាច់ត្រូវប្រើប្រាស់ប្រព័ន្ធទុយោទឹកសម្រាប់ស្រោចស្រព តែបើកសិករមានដីធំគេអាចជីកប្រឡាយ ដោយនៅក្នុងប្រឡាយអាចចិញ្ចឹមត្រីបានផងដែរ ។ ដំណាំដូងក្រអូបអាយុចាប់ពី ៤ ឆ្នាំឡើង ក្នុង ១ ហិកតា អាចប្រមូលផលបានពី ៥០០០ ទៅ ៨០០០ ដុល្លារ ក្នុង ១ ឆ្នាំ ពីការលក់ផ្លែដូង ៕