រំភើបណាស់! រកឃើញកូនផ្សោតកើតថ្មីដ៏ឃ្យូត អាយុប្រមាណ ២ សប្ដាហ៍ សម្ញែងខ្លួនលើទឹកដីក្រចេះ

នាយកដ្ឋាន អភិរក្សជលផល នាថ្ងៃទី ០៥ ខែមករា ឆ្នាំ ២០២២ បានជូនដំណឹង អំពីការរកឃើញកូនផ្សោតកើតថ្មីមួយក្បាល ដែលវាមានអាយុកាលប្រមាណជាពីរសប្តាហ៍ ត្រូវបានប្រទះឃើញនៅវេលាម៉ោង ៩:៣៦ នាទី កាលពីថ្ងៃទី ៣១ ខែ ធ្នូ ឆ្នាំ ២០២១។

ខាងនាយកដ្ឋាន បានបញ្ជាក់ផងដែរថា កាលពីថ្ងៃទី ៣១ ខែធ្នូ ឆ្នាំ ២០២១ កន្លងទៅនេះ ក្រុមការងារផ្នែកស្រាវជ្រាវ ដែលមានសមាសភាព មកពីរដ្ឋបាលជលផលខណ្ឌ រដ្ឋបាលជលផលក្រចេះ និងស្ទឹងត្រែង និង អង្គការ WWF ប្រចាំខេត្តក្រចេះ បានឃើញវត្តមានកូនផ្សោតដ៏ឃ្យូតនេះ កំពុងហែលទឹកលេងជាមួយក្រុមហ្វូងផ្សោតធំ ដែលមានចំនួនប្រាំក្បាល នៅក្នុងអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ទឹកដីខេត្តក្រចេះ។

ក្នុងនោះ ខាងក្រុមការងារ បានបញ្ជាក់បន្ថែមផងដែរថា កូនផ្សោតដែលបានប្រទះឃើញថ្មីនេះ គឺជាកូនផ្សោតទីប្រាំមួយ ដែលត្រូវបានកត់ត្រា ចាប់ពីខែមករា ដល់ខែធ្នូឆ្នាំ ២០២១ កន្លងមកនេះ៕