![ព្រឺព្រួច! ទម្លាយករណីពិតនៃរឿងនាងមច្ឆាស៊ីមនុស្សនៅបឹងមួយ ប្រទេស Zimbabwe](https://www.popular.com.kh/wp-content/uploads/2022/01/២-15.jpg)
ព្រឺព្រួច! ទម្លាយករណីពិតនៃរឿងនាងមច្ឆាស៊ីមនុស្សនៅបឹងមួយ ប្រទេស Zimbabwe
តើប្រិយមិត្តអ្នកជឿទេថា លើលោកនេះមានសត្វនាងមច្ឆា? រឿងនេះបានផ្ទុះកក្រើកនៅប្រទេស Zimbabwe ធ្វើឲ្យមនុស្សទូទាំងប្រទេសជឿថា ពិតជាមាននាងមច្ឆាពិតមែន។ វត្តមាននាងមច្ឆាមួយ ត្រូវបានគេប្រទះឃើញនៅទំនប់ Nemangwe ក្នុងតំបន់ Gokwe ។ នៅខែកុម្ភៈ ឆ្នាំ ២០០០ ព្រឹកនោះអ្នកភូមិ Mhondoro មានក្តីរន្ធត់ពន់ពេក ក្រោយសម្រែកក្មេងប្រុស ២នាក់បាន ស្រែកឲ្យគេជួយ ។ រឿងហេតុដ៏មិននឹកស្មានដល់កើតមាន ពេលក្មេងប្រុសពីរនាក់ដែលរស់នៅតំបន់នោះ បានជួបរឿងដ៏នឹកស្មានមិនដល់ អំឡុងពេលពួកគេកំពុងតែឃ្វាលគោ ស្រាប់តែពេលនោះគេបានប្រទះឃើញកន្ទុយនាងមច្ឆាផុសងើបឡើងចេញពីផ្ទៃទឹករវិចៗ។
ដោយយល់ច្រឡំថាវាជា «ត្រីធំ» ក្មេងប្រុសម្នាក់បានសម្រេចចិត្តស្ទុះហក់ទៅចាប់វា បន្សល់នៅក្មេងម្នាក់ទៀតលើគោកនៅមើលគោ។ ក្រោយទឹកខ្ចាយប្រូង ក៏បាត់ក្មេងនោះឈឹង រំពេចនោះ ដៃមួយលូកចេញពីទឹក ជាមួយនឹងសម្រែកហៅមិត្តរបស់ខ្លួនជួយសង្គ្រោះ គ្រានោះ មានមនុស្សនៅជុំវិញនោះសុទ្ធតែបានឃើញហេតុការណ៍នោះ អ្នកភូមិនាំគ្នារត់ទៅមើល ហើយក្មេងប្រុសនោបានហក់ទៅជួយមិត្តខ្លួន ចៃដន្យអី ក្មេងនោះចូលទៅ ក៏ត្រូវអូសទៅឆ្ងាយបាត់។ អ្នកស្រុកឈរមើលក្មេងប្រុសទាំង២នាក់លង់ទឹកយ៉ាងអាណោចអធម ជាមួយនឹងកន្ទុយត្រីហែលនាំពួកគេចេញពីមាត់ទឹកសំដៅទៅកណ្តាលទន្លេ ជាមួយសម្រែកស្រែករបស់អ្នកភូមិ និង ការខិតខំយកថ្មគប់ទៅសត្វនោះ។ មួយសន្ទុះក្រោយមក អ្នកស្រុកហ៊ោរអឺងកង ក្រោយឃើញ ក្មេងប្រុសទាំងពីរបានងើបឡើងវិញពីទឹកប្រឹងហែលឡើងពីទន្លេក្បែរទំនប់ ដោយប្រវេប្រវាហែលទៅទីទួលមួយផុសពីទឹកជិតដល់គោក។ សំណាងបំផុត ដែលពួកគេនៅមានជីវិតនៅឡើយ។ អ្នកភូមិដែលឈរមើលពីចម្ងាយត្រេកអរយ៉ាងខ្លាំង តែស្នាមញញឹម បានផ្លាស់ប្តូរមួយរំពេច ក្រោយភ្លាមៗ នាងមច្ឆាបានលេចមុខឡើងវិញហែលដេញពីក្រោយ។
មនុស្សគ្រប់គ្នា ស្រែកឆោឡោឲ្យក្មេងទាំង២ ឆាប់រត់ឡើងគោកចេញពីទឹក ព្រោះកន្ទុយនាងកំពុងផុសប្រដេញតាមពីក្រោយ ក្មេងទាំង២ហើយ តែ អកុសល ត្រីនោះបានលោតចេញពីទឹក ចេញរាងមនុស្សកន្ទុយត្រីយ៉ាងច្បាស់ស្តែងឡើងដែលពេលនោះនរណាៗក៏ឃើញវាដែរ។ វាបានហក់ កន្ទ្រប់ចាប់អូសក្មេងប្រុសទាំងពីរចូលទឹកវិញ ជាលើកទីពីរ។ ក្នុងទឹកពេញដោយឈាម លើកនេះគេឃើញ សពក្មេង ២នាក់នោះអូសអណ្តែតត្រាលើទឹកបឹងនោះ។ នេះជាហេតុការណ៍ដែលរៀបរាប់ដោយអ្នកស្រុក Gokwe ប្រទេស Zimbabwe ។ អាជ្ញាធរបានប្រកាសមិនឲ្យប្រជាជនទៅនៅក្បែរតំបន់នោះម្តងទៀត ហើយអ្នកស្រុកជាច្រើនបាននិយាយថា សត្វដែលនៅក្នុងទឹកនេះ គឺខ្លាចសំឡេងសត្វសុនខបំផុត ហើយករណីនេះ បាននាំឲ្យអ្នករស់នៅតំបន់នោះជាច្រើនបាននាំគ្នា រកកូនឆ្កែមកចិញ្ចឹមសឹងគ្រប់ផ្ទះ ៕