ស្រីៗបើចង់ដឹងថា អនាគតស្វាមីអាចមើលថែយើង និង កូនបានអត់ឬ គួររកបុរសមាន ៦ ចំណុចនេះ

ជារឿងដែលប្រិយមិត្តនារីគួរចាប់អារម្មណ៍ ប្រសិនបើអ្នកចង់ដឹងថា បុរសដែលជាគូរស្នេហ៍អាចមើលថែអ្នក និង សាងសុភមង្គលជាមួយអ្នកបានឬអត់នោះ អ្នកមិនគួរគ្រាន់តែស្ដាប់នូវអ្វីដែលគាត់បាននិយាយនោះទេ។ ជាក់ស្ដែង ធម្មជាតិពិតរបស់គាត់នឹងត្រូវបង្ហាញតាមរយៈចំណុចទាំង ៦ ខាងក្រោមនេះ។

១. ជាបុរសដែលមិនបង្ខំ ឬ ទាមទាររួមភេទច្រើនពេកជាមួយអ្នក

ជាការពិតណាស់ ប្រសិនបើគេជាបុរស ឬ ប្ដី ដែលគោរព និង ស្រឡាញ់អ្នកពិតប្រាកដ គេនឹងមិនដាក់ការរួមភេទនៅមុខនោះឡើយ ដោយត្រៀមខ្លួនយ៉ាងមានកម្រិត សម្រាប់មនុស្សជាទីស្រឡាញ់។ ផ្ទុយទៅវិញ បើគេមិនយកចិត្តទុកដាក់ លើគំនិត និង អារម្មណ៍អ្នកទេ នោះគេមិនមែនជាប្ដីដ៏ល្អរបស់អ្នកទៅថ្ងៃអនាគតឡើយ។

២. ជាមនុស្សដែលនិយាយតិច ធ្វើច្រើន ឬ ធ្វើច្រើនជាងនិយាយ

នៅពេលដែលអ្នកមានស្នេហា អ្នកប្រហែលជាចូលចិត្តឱ្យគាត់និយាយពាក្យផ្អែមល្ហែមដាក់អ្នក ប៉ុន្តែកុំប្រញាប់ជឿនូវអ្វីដែលគេសន្យា ត្រូវរង់ចាំរហូតដល់គេបញ្ចេញសកម្មភាព​ ឬ ទង្វើ ឱ្យអ្នកបានឃើញជាមុនសិន ព្រោះជាទូទៅ ទង្វើតែងតែជាក់លាក់ជាងសម្ដី។

៣. ជាបុរសដែលតែងសួរនាំ និង ព្រួយបារម្ភពីអ្នកភ្លាមៗ

ប្រសិនបើអ្នកឧស្សាហ៍ធ្លាក់ក្នុងស្ថានភាពសោកសៅ ឬ ឈឺ ប្រសិនបើគេយកចិត្តទុកដាក់ចំពោះអ្នក តែងតែសួរនាំអ្នក បង្ហាញទង្វើព្រួយបារម្ភពីអ្នក នោះវាបង្ហាញថាគេស្រឡាញ់អ្នកអស់ពីចិត្តហើយ ព្រោះស្នេហាត្រូវមានការថែទាំគ្នាទៅវិញទៅមក។

៤. ជាមនុស្សចេះទទួលស្គាល់កំហុស

ជាទូទៅ ការមានកំហុស ឬ មិនមាន ពេលខ្លះវាមិនសំខាន់ដូចការទទួលស្គាល់វាឡើយ ពោលគឺប្រសិនបើអ្នកជួបនឹងបុរសដែលចេះតែបន្ទោសខ្លួនឯងរាល់ពេល បន្ទោសលេស នោះការរស់នៅជាមួយមនុស្សបែបនេះ គឺមានតែទុក្ខពេញមួយជីវិតតែប៉ុណ្ណោះ។

៥. ជាមនុស្សដែលមានប្រាជ្ញា និង មានភាពកំប្លុកកំប្លែង

ជាការពិតណាស់ អ្នកគប្បីជ្រើសរើសបុរសណា ដែលព្យាយាមកំប្លែងឱ្យអ្នកសើច ឱ្យអ្នកបញ្ចេញមួយទំហឹងនូវស្នាមញញឹមនៃសេចក្ដីសុខ។ ពេលខ្លះបុរសបែបនេះ អាចមិនធូរធារ មិនហ៊ឺហារ ឡូយឆាយនោះទេ ប៉ុន្តែពេលបាននៅក្បែរគេ នឹងធ្វើឱ្យអ្នក ក៏ដូចជាកូនមានអារម្មណ៍កក់ក្ដៅ សប្បាយរីករាយ និង មានសុភមង្គល។

៦. ជាមនុស្សដែលមានភាពស្មោះត្រង់

នេះជាចំណុចដែលសំខាន់ និង ចាំបាច់ជាងគេ ប្រសិនបើដៃគូអ្នកមើលទៅមិនសូវស្មោះត្រង់ ជាមនុស្សតែងនិយាយលេងសើច និង ចែចង់ជាមួយស្រីដទៃ នោះអ្នកគួរតែនៅឱ្យឆ្ងាយពីគេ។ ចូរកុំគិតថា ក្រោយរៀបការ បុគ្គលិកលក្ខណៈបែបនេះគេនឹងកែប្រែ គឺវាមិនងាយនឹងប្រែប្រួលនោះឡើយ ដូច្នេះហើយចាំបាច់ជ្រើសរើសមនុស្សស្មោះត្រង់ពីចំណុចដំបូង រហូតដល់ថ្ងៃអាពាហ៍ពិពាហ៍របស់អ្នក៕

ប្រែសម្រួលពី ៖ Phunutoday