ប្រទេសកូរ៉េខាងជើង បានបញ្ជាក់ថា ប្រទេសខ្លួនទាំងមូល រកឃើញអ្នកកើតមានអាការក្ដៅខ្លួនរាប់ម៉ឺនករណី ដោយក្នុងនោះមនុស្សចំនួន ៦ នាក់បានស្លាប់ រួមមានទាំងអ្នកកើតអូមីក្រុងម្នាក់។
តាមភ្នាក់ងារសារព័ត៌មានកូរ៉េខាងជើង KCNA បានឱ្យដឹងនៅថ្ងៃទី ១៣ ខែឧសភា ឆ្នាំ ២០២២ នេះថា ៖ «ករណីក្ដៅខ្លួន ដោយមិនដឹងមូលហេតុ បានផ្ទុះឆ្លងពាសពេញប្រទេស តាំងពីចុងខែមេសាមកម្ល៉េះ។ ដោយត្រឹមមួយថ្ងៃទី ១២ ខែឧសភានេះ មានមនុស្សប្រមាណ ១៨ ០០០ នាក់ រកឃើញមានអាការក្ដៅខ្លួន»។ សារព័ត៌មាន KCNA បានឱ្យដឹងទៀតថា មនុស្សចំនួន ៦ នាក់បានស្លាប់ ដោយក្នុងនោះម្នាក់រកឃើញវិជ្ជមានកូវីដ-១៩ ប្រភេទអូមីក្រុង។
គួរឱ្យដឹងដែរថា ដំណឹងនៃករណីស្លាប់ដោយកូវីដ-១៩ ដំបូងនេះ គឺបានប្រកាសឡើង ក្រោយប្រទេសកូរ៉េខាងជើង រកឃើញករណីឆ្លងកូវីដ-១៩ ចូលក្នុងប្រទេសលើកដំបូងកាលពីម្សិលមិញនេះ។ បច្ចុប្បន្ន ខាងរដ្ឋាភិបាល ក៏កំពុងដាក់ចេញវិធានការណ៍តឹងរឹងបំផុត ដើម្បីបញ្ចៀសកុំឱ្យវីរុសរាតត្បាតកាន់តែខ្លាំងក្នុងប្រទេស៕
