ជិតលែងបានតាមដានប្ដី សង្សារ ឬ Crush ទៀតហើយ! Zenly នឹងផ្អាកដំណើរការឆាប់ៗនេះ

Zenly គឺជាកម្មវិធីទូរស័ព្ទដើម្បីចែករំលែកទីកន្លែង ដែលអ្នកប្រើប្រាស់កំពុងនៅទីតាំងណាមួយ ជាមួយនឹងមិត្តភក្ដិពួកគេយ៉ាងងាយស្រួល និង សុវត្ថិភាពបំផុតក្នុងចំណោមកម្មវិធីទូរស័ព្ទចែករំលែកទីតាំងផ្សេងៗទៀត។ Zenly វាមានដើមកំណើតចេញពីទីក្រុងប៉ារីស ប្រទេសបារាំងក្នុងឆ្នាំ ២០១១ ដោយសព្វថ្ងៃនេះ មានអ្នកប្រើប្រាស់ប្រមាណជា ៤០​ លាននាក់ជុំវិញពិភពលោក។

សម្រាប់ ចំណុចសំខាន់នៃកម្មវិធីទូរស័ព្ទមួយនេះគឺអនុញ្ញាតឱ្យមិត្តភក្តិអាចមើលឃើញ និង ចែករំលែកទីតាំងរបស់ពួកគេ បានយ៉ាងងាយស្រួល នៅលើផែនទីអន្តរកម្ម។

ដោយឡែក ថ្មីៗនេះមហាជន ជាពិសេសយុវវ័យស្ទើរពាសពេញពិភពលោក មានការភ្ញាក់ផ្អើល និង សោកស្ដាយយ៉ាងខ្លាំង ដោយក្រុមហ៊ុន Snap inc. បានប្រកាសថា កម្មវិធីទូរស័ព្ទមួយនេះ នឹងត្រូវបានបិទក្នុងរយៈពេលខ្លីខាងមុខនេះ ពោលគឺអាចនឹងថ្ងៃទី ១ ខែកុម្ភៈ ឆ្នាំ២០២៣។

រឿងមួយនេះ បានធ្វើឱ្យមហាជនយ៉ាងច្រើនឆ្ងល់ និងបានសួរសំនួរដូចៗគ្នាថា ហេតុអ្វី Zenly នៅសុខៗបែរជាប្រកាសផ្អាកដំណើរការទៅវិញ ទាំងដែលមានមនុស្សកំពុងប្រើយ៉ាងច្រើនបែបនេះ ?

យ៉ាងណាមិញ យោងតាមប្រព័ន្ធផ្សព្វផ្សាយមួយ បានទម្លាយមូលហេតុមួយ ក្នុងចំណោមមូលហេតុផ្សេងទៀត ដោយបានលើកឡើងថា៖ «បើទោះបីជា Zenly មានប្រជាប្រិយភាពក្នុងចំណោមអ្នកប្រើប្រាស់របស់ខ្លួនយ៉ាងច្រើនក៏ពិតមែន ប៉ុន្តែក្រុមហ៊ុនមិនអាចរកវិធីនៃការរកប្រាក់ចំណូលបានច្រើនពីអ្នកប្រើប្រាស់របស់ពួកគេនោះឡើយ។ ដោយខាងក្រុមហ៊ុន មិនអាចមានសមត្ថភាពក្នុងការបង្កើតប្រាក់ចំណេញ សម្រាប់ក្រុមហ៊ុនបានច្រើន ហេតុដូចនេះហើយ ទើបប្រធាននៃក្រុមហ៊ុន Snap INC. បានសម្រេចចិត្តបិទ Zenly ជាអចិន្ត្រៃយ៍ និង បង្វែរការយកចិត្តទុកដាក់របស់ខ្លួនទៅកាន់ផលិតផល ឬ កម្មវិធីបច្ចេកវិទ្យាផ្សេងៗទៀតដូចជា Snapchat ជាដើម»៕

ប្រភព៖ Life360