វត្តមួយនៅកម្ពុជាក្រោម រៀបចំស្អាតភ្លឹង រំលេចក្បូរក្បាច់រចនាប្រណីត មានព្រះពុទ្ធប្បដិមានិព្វានជ្រែកប្រឹក្សាយ៉ាងធំ

ផ្ទុះការចាប់អារម្មណ៍ពេញបណ្ដាញសង្គម ពីវត្តអារាមមួយកន្លែងដែលស្ថិតនៅកម្ពុជាក្រោម មានការរៀបចំ តុបតែងយ៉ាងស្រស់ស្អាត ជាពិសេសមានរូបបដិមាព្រះពុទ្ធយាងចូលបរិនិព្វានយ៉ាងធំសម្បើមជ្រែកប្រឹក្សាគួរឱ្យចង់ទស្សនា។

វត្តអារាម ដែលមានទីតាំងនៅកម្ពុជាក្រោមនេះ ត្រូវបានគេស្គាល់ឈ្មោះថា «វត្តបទុមវង្សាសំរោង» ជាវត្តខ្មែរមួយស្ថិតក្នុងខេត្តឃ្លាំង កម្ពុជាក្រោម ដោយនៅទីអារាមនេះមានរូបសំណាក់ព្រះពុទ្ធយាងចូលបរិនិព្វាន ដែលមានប្រវែង ៦៣ ម៉ែត្រ និង កម្ពស់ ២២.៥ ម៉ែត្រ អមដោយជើងទម្រពីក្រោមដែលសរុបកម្ពស់ពីដី ២៨ ម៉ែត្រ។

វត្តបទុមវង្សាសំរោង បានរៀបចំ និង ថែរក្សាទម្រង់ក្បាច់ដើមដោយមិនឱ្យបាត់បង់នោះឡើយ នៅតាមវិហារ សាលាឆាន់ និង ប្រាសាទផ្សេងៗគឺនៅថែរក្សាទម្រង់ដើម ទោះមានការលាបពណ៌ច្នៃថ្មីខ្លះៗក្ដី។

យោងតាមគេហទំព័រ Tham Hiem Mekong បានឱ្យដឹងថា វត្តនេះត្រូវបានសាងសង់នៅក្នុងឆ្នាំ ១៧៨៥ ដោយដើមឡើយបាន​សាងសង់ពីឈើឫស្សី ប្រក់ស្លឹក ហើយក្រោយមកក៏បានរុះសង់ថ្ម រហូតដល់សព្វថ្ងៃ។ ពាក្យ «សំរោង» ដែលបានបញ្ចូលនៅក្នុងឈ្មោះវត្ត ព្រោះដើមឡើយវត្តនេះសម្បូរទៅដោយដើមសំរោងជុំវិញវត្ត តែបច្ចុប្បន្ននេះដើមសំរោងនៅសល់តែ ២ ដើមតែប៉ុណ្ណោះដោយយោងតាមការបញ្ជាក់ពីព្រះសង្ឃក្នុងវត្ត៕

ប្រភព៖ ទំព័រវត្តបទុមវង្សាសំរោង/Tham Hiem Mekong