មិនសរសើរមិនបាន! អ្នកនេសាទសម័យទំនើប ច្នៃកូនទូកដាក់ម៉ូទ័រ មានតេឡេបញ្ជាយ៉ាងឡូយ

មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ជាខ្លាំង ក្រោយបានឃើញនូវរូបភាពក៏ដូចជាវីដេអូ កូនទូកនេសាទប្រើម៉ូទ័រមួយ កែច្នៃឡើងដោយស្នាដៃកូនខ្មែរ ជាអ្នកនេសាទនៅស្រុកស្ទឹងហាវ ទឹកដីខេត្តព្រះសីហនុ។

រូបភាព និងវីដេអូដែលកំពុងផ្ទុះការចាប់អារម្មណ៍នេះ ត្រូវបានបង្ហោះដោយគណនីមួយដែលមានឈ្មោះ Sam Monea Chea ដែលលោកបានបញ្ជាក់នាពេលថ្មីៗនេះឱ្យបានដឹងថា មិត្តភក្តិរបស់លោកមានឈ្មោះ ប៉ូច ប៊ុនឈឿន ជាប្រជានេសាទស្រុកស្ទឹងហាវ ខេត្តព្រះសីហនុ ក្រោយចប់ការងារនេសាទ គឺគាត់តែងឆ្លៀតឱកាសកែច្នៃយកឈើមកធ្វើជា តុ ទូ សម្រាប់ប្រើប្រាស់ក្នុងផ្ទះ និង របស់កែកម្សាន្ត ដូចជាទូកនេះជាដើម។

លក្ខណៈពិសេសរបស់ទូកដែលកែច្នៃនេះ គឺធ្វើឡើងដូចទូករបស់គាត់ ដែលកំពុងនេសាទរាល់ថ្ងៃតែម្ដង ខណៈប្រវែងទូក ១ ម៉ែត្រ ៣ តឹក ទទឹងប្រវែង ៤ តឹក ២ ហ៊ុន និង ជម្រៅ ២ តឹក ៥ ហ៊ុន ប្រើប្រាស់ដោយកម្លាំងម៉ូទ័រ មិនមែនម៉ាស៊ីនទេ ហើយមានតេឡេបញ្ជាទៀត។

បុរសដែលជាមិត្ត លោក ប៉ូច ប៊ុនឈឿន ដែលជាអ្នកច្នៃកូនទូកនេះ បានស្ញើចសរសើរនូវសមត្ថភាពថា លោកជាមនុស្សពូកែ ព្រមទាំងព្យាយាម អត់ធ្មត់ ហ្មត់ចត់បំផុតផងដែរ៕

សូមទស្សនាវីដេអូនៅខាងក្រោម ៖