ធ្លាប់បត់ពេញៗក្រឡឱ្យ Crush! ឥលូវមកដឹងប្រភពដើមនៃការបត់ផ្កាយក្រដាស និង អត្ថន័យតាមចំនួន ដឹងហើយភ្លឺភ្នែក

អត្ថបទដោយ៖ Vathey វិច្ឆិកា ២៥, ២០២៤

ជាការពិតណាស់ អំឡុងពេលសិក្សានៅវ័យជំទង់ អាចនឹងមានយុវវ័យជាច្រើនបានជ្រើសរើសការបត់ផ្កាយក្រដាសដាក់ក្រឡ ដើម្បីជូនជាកាដូសម្រាប់មិត្តភក្តិ និង មនុស្សពិសេសជាក់ជាមិនខាន។ ក្នុងនោះ អាចនឹងមានមនុស្សភាគច្រើនចាត់ទុកថាការជូនកាដូជាផ្កាយក្រដាសនេះ គឺមានអត្ថន័យត្រឹមតែការបង្ហាញក្តីស្រឡាញ់ប៉ុណ្ណោះ ប៉ុន្តែការពិតទៅការបត់ផ្កាយក្រដាសគឺមានអត្ថន័យរបស់វា។

ផ្កាយក្រដាស ត្រូវបានគេហៅឈ្មោះមួយទៀតថា តារាសំណាង ដោយវាមានដើមកំណើតចាប់ផ្តើមដំបូងពីក្មេងស្រីជនជាតិជប៉ុនម្នាក់ឈ្មោះ Hoshi។ Hoshi ជាក្មេងស្រីម្នាក់ដែលស្រឡាញ់ផ្កាយ ហើយនៅយប់មួយនាងកំពុងតែមានភាពសោកសៅ ស្រាប់តែនាងបានឃើញអាចម៍ផ្កាយធ្លាក់ពីលើមេឃ។

ចាប់តាំពីថ្ងៃនោះមក នាងបានបត់ផ្កាយក្រដាសដាក់ក្នុងក្រឡម្តងមួយៗរាល់ពេលដែលមានអាចម៍ផ្កាយធ្លាក់។ ម្យ៉ាងវិញទៀត ផ្កាយក្រដាសត្រូវបានបត់ឡើងដោយក្រដាសប្រភេទម្យ៉ាងឈ្មោះថា Origami ដោយជាទូទៅគឺធ្វើឡើងសម្រាប់ជាអំណោយដល់មនុស្សជាទីស្រឡាញ់ ដើម្បីជានិមិត្តរូបនៃសំណាងល្អ សេចក្តីស្រឡាញ់ និង ការគាំទ្រ ជាដើម។