ចូលរួមទាំងអស់គ្នា! នៅថ្ងៃទី ១៣ នឹងមានកម្មវិធីពិព័រណ៍សិល្បៈសប្បុរសធម៌ និង ការដេញថ្លៃ ដើម្បីជួយកុមារ ឆលី និង កុមារៗកម្ពុជាកើតជំងឺមហារីក

កាលពីរសៀលថ្ងៃ ០៨ ខែកញ្ញា ឆ្នាំ  ២០២៤ ស្ថិតនៅមជ្ឈមណ្ឌល LIXIN CEO លោក ព្រហ្ម ពន្លឺ សិល្បករគំនូរសហសម័យមកពីខេត្តសៀមរាប បានធ្វើសន្និសីទសារព័ត៌មាន ស្តីពីពិព័រណ៍សិល្បៈសប្បុរសធម៌ និង ការដេញថ្លៃ ក្រោមប្រធានបទ «Infinity»​ ដើម្បី​ស្វែងរកមូលនិធិបន្ថែម សម្រាប់ការព្យាបាលជំងឺមហារីកខួរក្បាលរបស់កុមារ ឆលី ដែលត្រូវជាកូនប្រុសរបស់លោក។

ពិព័រណ៍សិល្បៈសប្បុរសធម៌ និង ការដេញថ្លៃនេះ នឹងប្រព្រឹត្តឡើងនៅល្ងាចថ្ងៃទី ១៣ ខែកញ្ញា ឆ្នាំ ២០២៤ ដែលរៀបចំឡើងដោយមជ្ឈមណ្ឌល LIXIN CEO និង TRIBE Cambodia។

លោក ព្រហ្ម ពន្លឺ បានលើកឡើងថា កន្លងមកកម្មវិធីមូលនិធិសម្រាប់កុមារ ឆលី បានធ្វើម្តងរួចមកហើយ ប៉ុន្តែដោយសារការព្យាបាលដំណាក់កាលបន្ទាប់មានតម្លៃថ្លៃ លោកមិនមានលទ្ធភាពគ្រប់គ្រាន់ ទើបសម្រេចចិត្តបង្កើតព្រឹត្តិការណ៍នេះមួយទៀតឡើង។ លោកថាកន្លងមកលោកបានចំណាយលើការព្យាបាលអស់ទឹកប្រាក់ប្រមាណ ១៤ ម៉ឺនដុល្លារ ហើយសម្រាប់ការព្យាបាលបន្ទាប់អាចត្រូវចំណាយពី ៤​-៥ ម៉ឺនដុល្លារ។ នេះមិនរាប់បញ្ចូលចំណាយលើការស្នាក់នៅ ហូបចុក និង ធ្វើដំណើរនោះទេ។

ទាក់ទិននឹងស្ថានភាពរបស់កុមារ ឆលី លោក ព្រហ្ម ពន្លឺ ដែលត្រូវជាឪពុកបានឱ្យដឹងថា មកទល់ពេលនេះ ឆលី បានព្យាបាលដំណាក់កាល ៣ ធំៗ។ ដំណាក់កាលទី ១ វះកាត់ខួរក្បាល (ជោគជ័យ)​, ដំណាក់កាលទី ២ ព្យាបាលដោយបាញ់កាំរស្មី (ជោគជ័យ) និង ដំណាក់កាលទី ៣ បញ្ចូលគីមី ជាដំណាក់កាលចុងក្រោយ។

ការចូលរួមកម្មវិធីពិព័រណ៍សិល្បៈសប្បុរសធម៌ និង ការដេញថ្លៃនេះ ភ្ញៀវអាចជាវសំបុត្រសម្រាប់ការចូលរួម ដែលមានតម្លៃត្រឹមតែ ៨ ដុល្លារប៉ុណ្ណោះ។ សំបុត្រមានរាប់បញ្ចូលភេសជ្ជៈឥតគិតថ្លៃ ជាមួយអាហារសម្រន់ឆ្ងាញ់ពិសា។ មានការសម្តែងរបាំជូនពរ ការច្រៀងចម្រៀង និង ការដើរបង្ហាញម៉ូដរបស់កូនសិស្សមកពីសាលា Lotus Dance Studio។ ជាពិសេស ស្នាដៃសិល្បៈដើមជាង ៣០ ដែលត្រូវបានបរិច្ចាគដោយសិល្បករជាតិ និង អន្តរជាតិល្បីឈ្មោះនៅកម្ពុជា នឹងបើកឱ្យដេញថ្លៃនៅក្នុងព្រឹត្តិការណ៍តែម្តង។​

ថវិកាទាំងអស់ដែលប្រមូលបានពីការលក់សំបុត្រ និង ស្នាដៃសិល្បៈនឹងត្រូវបរិច្ចាគទៅកាន់កុមារ ឆលី ដែលកើតជំងឺមហារីកដំណាក់កាលទី ៤ និង កុមារកម្ពុជាផ្សេងៗទៀតដែលកើតជំងឺមហារីកផងដែរ៕