ថ្ងៃចុងក្រោយ! ទោះមេឃរលឹមផ្សែងក្រូចតិចៗ ក៏មានមនុស្សម្នាណែនក្ដន់ ក្រោកពីព្រលឹមស្រាងៗរង់ចាំមើលព្រឹត្តិការណ៍សមរាត្រីមុខអង្គរវត្ត

នៅថ្ងៃទី ២៣ ខែកញ្ញា ឆ្នាំ ២០២៤ នេះ គឺជាថ្ងៃចុងក្រោយនៃព្រឹត្តិការណ៍សមរាត្រី ឬ ថ្ងៃរះចំកំពូល​កណ្តាល​ប្រាសាទអង្គរវត្ត ខណៈសមរាត្រីប្រចាំឆ្នាំលើកទី ២ នេះ មានរយៈពេល ៣ ថ្ងៃចាប់ពីថ្ងៃទី ២១ ដល់ថ្ងៃទី ២៣ ខែកញ្ញា ឆ្នាំ ២០២៤។

ដ្បិតថាថ្ងៃនេះជាថ្ងៃចុងក្រោយ តែព្រឹកមិញនេះ ក្រសួងព័ត៌មាន បានបញ្ជាក់ឱ្យបានដឹងថា មានភ្ញៀវទេសចរយ៉ាងច្រើនកុះករ បានប្រមូលផ្តុំគ្នាខាងមុខប្រាង្គប្រាសាទអង្គរវត្ត ដើម្បីរង់ចាំទស្សនាថ្ងៃរះចំកំពូលកណ្តាលប្រាសាទអង្គរវត្ត ដែលជាព្រឹត្តិការណ៍អច្ឆរិយៈរបស់ព្រះរាជា​ណាចក្រកម្ពុជា។ ទោះបីជាមានផ្ទៃមេឃជួនមានភ្លៀងរលឹមតិចៗ ជួនរលឹមផ្សែងក្រូចក្តី ក៏ប្រជាពលរដ្ឋ និង ទេសចរជាតិ អន្តរជាតិ ក្រោកតាំងពីព្រលឹមស្រាងៗ ដើម្បីរង់ចាំទស្សនា​ទិដ្ឋភាព​ដ៏អស្ចារ្យនេះ ជាមួយនឹងការឆ្លៀត​ចូល​ទស្សនាសម្រស់ប្រាសាទ​អង្គរវត្តនាព្រឹកព្រលឹមដែលមានសម្រស់ដោយឡែក និង ធាតុអាកាសត្រជាក់ស្រេង។

គួរឱ្យដឹងផងដែរថា រយៈពេល ៣ ថ្ងៃចាប់ពីថ្ងៃទី ២១ ដល់ថ្ងៃទី ២៣ ខែកញ្ញា ឆ្នាំ ២០២៤ នេះ ភ្ញៀវទេសចរជាតិ និង អន្តរជាតិ សរុបជិត ៤ ម៉ឺននាក់ ដែលបានចូលទៅទស្សនាថ្ងៃរះចំកំពូលប្រាសាទអង្គរវត្ត៕

សូមទស្សនាទិដ្ឋភាពនៅខាងក្រោម ៖

ប្រភពរូបភាព ៖ ក្រសួងព័ត៌មាន