ជ្រះថ្លា! ប្រឡងបាក់ឌុប ២ ថ្ងៃ វត្តព្រៃឆ្លាក់នៅស្វាយរៀង រៀបចំអាហារសាមគ្គីច្រើនមុខ ដល់បេក្ខជនប្រឡងបាក់ឌុប

នៅថ្ងៃទី ០៨ ខែតុលា ឆ្នាំ ២០២៤ នេះ គឺជាថ្ងៃប្រឡងទី ១ នៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤ ដែលនៅតាមរាជធានីខេត្ត មានរៀបចំការប្រឡងទៅតាមមណ្ឌល ដែលក្នុងនោះ មានសប្បុរសជនជាច្រើនមានសណ្ដានចិត្តល្អប្រពៃ ផ្ដល់នូវកន្លែងស្នាក់នៅ សម្រាប់បេក្ខជនដែលធ្វើដំណើរមកពីទីឆ្ងាយដើម្បីប្រឡងសញ្ញាបត្រមធ្យមសិក្សារបស់ខ្លួន។

ក្នុងឱកាសថ្ងៃប្រឡងនេះផងដែរ បើយើងក្រឡេកទៅមើលទីតាំងវត្តមួយដែលមានឈ្មោះ វត្តព្រៃឆ្លាក់ ស្ថិតក្នុងខេត្តស្វាយរៀង បានរៀបចំទទួលភត្ត និង អាហារប្រគេនព្រះសង្ឃ ព្រមទាំងបងប្អូនទាំងអស់ ដែលនិមន្ត និង អញ្ជើញទៅប្រឡងនៅក្នុងខេត្តស្វាយរៀង យ៉ាងកក់ក្តៅបំផុត។

បើតាមការជូនដំណឹងពីវត្តព្រៃឆ្លាក់ ក្រុងស្វាយរៀង បានឱ្យដឹងថា នៅបរិវេណវត្ត ក្នុងឱកាសប្រឡងបាក់ឌុប ២ ថ្ងៃ គឺបងប្អូនកូនចៅអាចអញ្ជើញពិសាអាហារសាមគ្គីរយៈពេលពីរថ្ងៃដោយឥតគិតថ្លៃ ហើយចំពោះការឧបត្ថម្ភ គឺបានមកអំពីទឹកព្រះទ័យរបស់ព្រះថេរានុថេរគ្រប់ព្រះអង្គ មានឯកឧត្តម លោកជំទាវ និង សប្បុរសជនទាំងអស់ដែលជាម្ចាស់ទាន៕