(វីដេអូ) វិលដល់ខេត្តវិញ ចំណុះទូក និង ទូកង «និរន្ទរង្សីពិជ័យចិត្របុត្រ» ត្រូវអ្នកស្រុកភូមិនាំគ្នាមកហែហមអបអរយ៉ាងរំភើបពេញផ្លូវ

គិតត្រឹមរសៀលថ្ងៃទី ១៨ ខែវិច្ឆិកា ឆ្នាំ ២០២៤ នេះ ទូកងប្រចាំខេត្តបាត់ដំបង អធិរាជដងស្ទឹងសង្កែ «និរន្ទរង្សីពិជ័យចិត្របុត្រ» បានមកដល់វត្តឯករង្សីវិញហើយ ក្រោយទទួលបានចំណាត់ថ្នាក់ផ្នែកសោភ័ណភាព ចំណាត់ថ្នាក់ល្បឿនផែនលេខ ១ និង ចំណាត់ថ្នាក់លេខ ៥ ផ្នែកល្បឿនទូទាំងប្រទេស ដោយបានឈ្នះ ៥ ជើង ក្នុងការប្រកួត ៦ ជើង ក្នុងឱកាសព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក ឆ្នាំ ២០២៤។

ថ្វីដ្បិតតែមិនទទួលបានជ័យលាភីលេខ ១ ផ្នែកល្បឿនទូទាំងប្រទេស ក្នុងឆ្នាំ ២០២៤ នេះក៏ពិតមែន ប៉ុន្តែប្រជាប្រិយភាពនៃទូកង «និរន្ទរង្សីពិជ័យចិត្របុត្រ» កំពុងធ្វើឱ្យបងប្អូនគ្រប់ខេត្តក្រុងស្ងើចសរសើរ និង ស្រឡាញ់ពេញចិត្តស្ដូកតែម្ដង ក៏ដោយសារតែរចនាបទសោភ័ណភាពនៃទូក វិន័យ ពិសេសគឺសាមគ្គីភាពក្នុងក្រុមតែម្ដង ដែលធ្វើឱ្យមហាជនអ្នកប្រើប្រាស់បណ្ដាញសង្គមសរសើរមិនដាច់ពីមាត់ ព្រមទាំងបានបង្ហោះវីដេអូជាហូរហែនៅលើបណ្ដាញសង្គម។

ជាក់ស្ដែង បន្ទាប់ពីបញ្ចប់ការប្រកួតប្រណាំងទូកង នៅរាជធានីភ្នំពេញ កាលពីថ្ងៃទី ១៦ ខែវិច្ឆិកា ឆ្នាំ ២០២៤ កន្លងទៅ ក្នុងកំឡុងពេលធ្វើដំណើរត្រឡប់ទៅកាន់វត្តឯករង្សី នាទឹកដីខេត្តបាត់ដំបងវិញនោះ គេសង្កេតឃើញមានប្រិយមិត្តអ្នកគាំទ្រជាច្រើនបានចូលរួមដង្ហែអបអរគាំទ្រទៅដល់កីឡាករទូក និង ទូកងដ៏មានប្រជាប្រិយភាពនេះ ដោយបាននាំគ្នាថតរូបជាមួយ មានទាំងសិស្សានុសិស្សឈរត្រៀបត្រាអមសងខាងផ្លូវ បង្ហាញនូវទឹកចិត្តគាំទ្រទូកង ក្នុងទឹកដីកំណើត ជាសក្ខីភាពបង្ហាញថា ឆ្នាំនេះ ទូកង «និរន្ទរង្សីពិជ័យចិត្របុត្រ» ពិតជាមានប្រជាប្រិយភាព និង ឆក់បេះដូងបងប្អូនខ្មែរ ឱ្យងាកមកចាប់អារម្មណ៍វិស័យទូកង បានកាន់តែច្រើនជាងឆ្នាំមុនៗ៕

សូមទស្សនាវីដេអូនៅខាងក្រោម ៖