ចេះធ្វើអ៊ីចឹងកើត! ពលរដ្ឋជិត ១ ពាន់គ្រួសារដាច់ភ្លើងប្រើប្រាស់ ក្រោយស្ត្រីម្នាក់លួចឡើងបង្គោលភ្លើងរាំតោងលេង
វេលាម៉ោងប្រមាណ ១១ ព្រឹកថ្ងៃទី ១៣ ខែវិច្ឆិកា ឆ្នាំ ២០២៤ កន្លងទៅ (ពេលវេលាក្នុងតំបន់) មានករណីដ៏កម្រ និង ហួសចិត្តមួយកើតមានឡើងនៅក្រុង Salt Lake រដ្ឋ Utah សហរដ្ឋអាមេរិក ដោយមានស្ត្រីម្នាក់បានលួចឡើងបង្គោលភ្លើងក្នុងតំបន់ តោងរាំរែកតែងតោងដូចស្វាយ៉ាងសប្បាយរីករាយដោយមិនខ្វល់ពីគ្រោះថ្នាក់អ្វីសោះឡើយ។
យ៉ាងណាមិញ ជាសំណាងល្អក្រោយមានករណីបែបនេះ ខាងក្រុមហ៊ុនអគ្គិសនីក៏សម្រេចចិត្តបិទចរន្តភ្លាមៗដើម្បីធានាពីសុវត្ថិភាពស្ត្រីរូបនោះ តែអាចថាជារឿងមិនល្អសម្រាប់ពលរដ្ឋប្រមាណ ៨០០គ្រួសារដែលត្រូវមកអត់អគ្គិសនីប្រើប្រាស់មួយរយៈដោយសារករណីកម្រនេះ។
បើតាមសារព័ត៌មាននៅសហរដ្ឋអាមេរិកបានឱ្យដឹងថា មានគេឃើញស្ត្រីស្លៀកសំពត់ខ្លីពណ៌ក្រហម ពាក់អាវខ្មៅ ដែលមើលទៅហាក់មានបញ្ហាផ្លូវចិត្តបានឡើងបង្គោលភ្លើងតោងរាំចុះឡើងស្រែកឡូឡា ហើយក៏បានទាក់ទងទៅប៉ូលិសឱ្យចុះមកអន្តរាគមន៍។ ក្រោយទទួលការរាយការណ៍ ប៉ូលិសក៏បានទៅដល់ទីតាំងភ្លាមៗ ហើយក៏ បានលួងលោមឱ្យស្ត្រីនោះចុះក្រោមវិញ តែស្ត្រីរូបនោះហាក់មិនខ្វល់ឡើយនៅតែធ្វើសកម្មភាពដ៏គ្រោះថ្នាក់ដូចដើម។
ដោយអស់ជម្រើស ប៉ូលិសក៏បង្ខំចិត្តត្រូវប្រើកម្លាំងបាយតិចតួចរហូតនាំយកស្ត្រីរូបនោះចុះមកក្រោមវិញបានដោយសុវត្ថិភាព។ រូបនាងក៏បានបញ្ជូនចូលឡានរួចដឹកយកទៅមន្ទីរពេទ្យផ្លូវចិត្តដើម្បីទទួលការព្យាបាល៕
ប្រភព៖ Kenh14
