ចុងភៅរូបសង្ហា កាលអាយុ ១៣ ឆ្នាំរៀនធ្វើម្ហូបពីម្តាយ ២០ ឆ្នាំក្រោយមានហាងផ្ទាល់ខ្លួន ក្លាយជាចុងភៅដ៏ជំនាញ និង នាំយកផលិតផលទៅកាន់ពិភពលោក

ជាចុងភៅដ៏ជំនាញ មានគំនិតច្នៃប្រតិដ្ឋខ្ពស់ បច្ចុប្បន្ន លោក Sokim Heng ជាស្ថាបនិកសេវាកម្មអាហារ Bite Lab និង ជាស្ថាបនិកកន្លែងផ្តល់សេវាកម្មទទួលទានអាហារផ្ទាល់ខ្លួន The Lab នៅទីក្រុងភ្នំពេញ។ ដំណើរជីវិតចូលទៅក្នុងវិស័យអាហារ លោកបានចាប់ផ្តើមតាំងពីអាយុ ១៣ ឆ្នាំ គ្រាដែលឪពុកម្តាយរបស់លោកបើកភោជនីយដ្ឋានមួយនៅខេត្តព្រះសីហនុ ឈ្មោះថា Chez Claude។ ខណៈដែលឪពុកម្តាយបានត្រលប់ទៅប្រទេសបារាំងវិញ លោកបានរៀនសូត្របទពិសោធយ៉ាងច្រើនពីភោជនីយដ្ឋាននេះ។ ថ្វីបើឆ្ងាយពីម្តាយក្តី តែលោកបានរៀនជំនាញធ្វើម្ហូបពីគាត់តាមរយៈប្រព័ន្ធអនឡាញ។ ការចាប់ផ្តើមដំបូង លោកក៏មានអារម្មណ៍ភ័យព្រួយផងដែរ តែយ៉ាងណាមិញ លោកបានព្យាយាមពង្រឹងជំនាញឱ្យល្អបំផុត ដើម្បីប្រាកដថាភោជនីយដ្ឋានដំណើរការទៅរលូន។

​បោះជំហានលើជំនាញម្ហូបអាហារនៅភោជនីយដ្ឋានរបស់គ្រួសារ បានធ្វើឱ្យលោកមានមហិច្ឆតាកាន់តែខ្លាំង។ ជាក់ស្តែង លោកបានចេញទៅបណ្តុះបណ្តាលជំនាញបន្ថែមនៅ Le Cordon Bleu ដែលជាសាលាធ្វើម្ហូប និង បដិសណ្ឋារកិច្ចដ៏ល្បីល្បាញនៅទីក្រុងបាងកក ប្រទេសថៃ។ ការរៀននៅទីនោះ បានជួយបង្កើនចំណេះជំនាញលោកយ៉ាងច្រើន លោកជឿជាក់ថា ចុងភៅលំដាប់ផ្កាយ Michelin-starred ជនជាតិបារាំង លោក Nicolas Le Bec គឺជាផ្នែកមួយមានឥទ្ធិពលបំផុតមកលើលោក។ តាមរយៈសិល្បៈម្ហូបអាហារ វាបាននាំលោកទៅជុំវិញពិភពលោក និង បានផ្លាស់ប្តូរបទពិសោធជាច្រើន ដោយធ្វើការជាមួយចុងភៅល្បីៗដូចជា ចុងភៅ Le Bec ដែលបានកសាងអាជីព ផ្តល់នូវការយល់ដឹងដ៏ជ្រាលជ្រៅទៅក្នុងសិល្បៈម្ហូបអាហារ។

ក្រោយមកនៅឆ្នាំ ២០១៩ លោក​ Sokim Heng បានបើកសេវាកម្មអាហារ Bite Lab ជាមួយដៃគូជំនួញម្នាក់ឈ្មោះ David។ សេវាកម្មនេះ លោកបានបង្កើតទីពិសោធន៍ ដែលផ្តោតទៅលើអាហារសុខភាពជាមួយគោលដៅហាត់ប្រាណ។ ចក្ខុវិស័យរបស់លោក ក៏រួមបញ្ចូលជាកន្លែងផ្តល់បទពិសោធទទួលទានអាហារផ្ទាល់ខ្លួនហៅថា The Lab ដែលជាការផ្តល់សេវាកម្មទទួលទានអាហារជាក្រុម ជំរុញការបង្កើតទំនាក់ទំនង និង ពេលវេលាដែលមិនអាចបំភ្លេចបានផងដែរ។ សម្រាប់លោក ម្ហូបអាហារមិនត្រឹមតែជាអាហាររូបត្ថម្ភប៉ុណ្ណោះទេ វាជាភាសាក្តីស្រលាញ់សកល  និង ជាស្ពានចម្លងឱ្យបុគ្គលម្នាក់ៗបានភ្ជាប់ទំនាក់ទំនងគ្នា។

មិនត្រឹមតែជំនាញធ្វើម្ហូបនៅក្នុងផ្ទះបាយ លោកក៏ដើរតួជា Influencer ខាងចម្អិនម្ហូបផងដែរ។ លោកតែងបង្ហាញទេពកោសល្យនៅលើបណ្តាញសង្គម តាមរយៈវីដេអូចម្អិនម្ហូបខ្លីៗ។  លោកបើកបង្ហាញកំណប់មុខម្ហូបខ្មែរ ដោយគោរពទៅលើគ្រឿងផ្សំ ក៏ដូចជាបង្ហាញនូវធនធានដ៏សម្បូរបែបនៅកម្ពុជា ដើម្បីរួមចំណែកពង្រីកវិស័យម្ហូបអាហារនៅកម្ពុជាយើង។

មហិច្ឆតារបស់ចុងភៅសង្ហាវ័យ ៣៤ ឆ្នាំរូបនេះ លោកចង់បោះជំហានឱ្យឆ្ងាយលើសពីភោជនីយដ្ឋាន។ ចក្ខុវិស័យរបស់លោក គឺបង្កើតម៉ាកអាហារ និង វិសាលភាពដោយខ្លួនឯង។ លោកបានកំពុងផ្តោតអភិវឌ្ឍន៍ទៅលើអាហារស្រាប់ៗ រសជាតិឈ្ងុយឆ្ងាញ់ដូចជា៖ ងៀតគោពិសេស, ងៀតត្រី, ថ្លើមក្ងាន foie gras​, ប៊័រផ្សិត truffle butter និង limoncello ជាដើម។ អាហារទាំងនេះសុទ្ធសឹងកើតចេញពីឯកទេសរបស់លោក ហើយក៏ត្រៀមរួចជាស្រេចសម្រាប់ទាក់ទាញមាត់មនុស្សទូទាំងពិភពលោក។ លោកមានគោលដៅចង់ឱ្យមនុស្សគ្រប់ជាតិសាសន៍ បានស្គាល់ពីផលិតផលក្នុងស្រុកនៅក្នុងរយៈពេលពីរឆ្នាំ និង ប្រាំឆ្នាំទៀតលក់ទៅកាន់ទីផ្សារទូទាំងអាស៊ី ហើយបន្ទាប់មកនៅទូទាំងពិភពលោក៕

ប្រភព៖ Prestige