ចលាចលពេញយន្តហោះ ខណៈកំពុងហោះសុខៗ ស្រាប់តែធ្លាយទឹកចានបង្គន់រហូតលិចពេញកាប៊ីន

ថ្មីៗនេះ មានករណីមួយកំពុងផ្ទុះការចាប់អារម្មណ៍ពីមហាជន ដោយមានយន្តហោះមួយគ្រឿងកំពុងហោះសុខៗ ស្រាប់តែមានទឹកហូរចេញពីចានបង្គន់មិនឈប់រហូតដល់លិចពេញកាប៊ីន បង្កឱ្យអ្នកដំណើរជ្រួលច្របល់។

តាមព័ត៌មានបានឱ្យដឹងថា យន្តហោះមួយគ្រឿងនេះជាជើងហោះហើររបស់ American Airlines ដែលធ្វើដំណើរពី Dallas រដ្ឋ Texas ទៅ Minneapolis រដ្ឋ Minnesota។ ខណៈកំពុងហោះហើរនោះ ស្រាប់តែមានទឹកហូរចេញពីចានបង្គន់មិនឈប់សោះ ឯខាងបុគ្គលិកក៏ព្យាយាមទប់ស្កាត់ដែរ ប៉ុន្តែនៅតែមិនអាចគ្រប់គ្រងបាន ដែលធ្វើឱ្យទឹកហូរចូលមកក្នុងកាប៊ីនអ្នកដំណើរពាសពេញតែម្តង។

យ៉ាងណាមិញ អ្នកដំណើរម្នាក់ៗមានការជ្រួលច្របល់ភិតភ័យមិនតិចឡើយ ប៉ុន្តែធ្វើអ្វីមិនបានក្រៅពីនាំគ្នាដូរកន្លែងអង្គុយ។ ដោយឡែក មហាជននៅតាមបណ្តាញសង្គមវិញ ក៏មិននឹកស្មានដែរថាអាចនឹងមានរឿងបែបនេះកើតឡើងនៅលើយន្តហោះ ហើយក៏ព្យាយាមមើលជាគំរូទុកដើម្បីប្រុងប្រយ័ត្នខ្លួនឯងផងដែរ៕

ប្រភព៖ Khaosod