ពៅ លីដា ជួបគ្នាជាមួយ ប៉ែន ភ័ក្រ សុធារិទ្ធ ជាលើកដំបូងក្នុងរឿង «ក្រមុំឆ្នាស់ ប៉ះ មេស្រុកឆ្នើម» នឹងមាននៅ ភីអិនអិន ក្នុងពេលឆាប់ៗនេះ (មានវីដេអូ)
ខ្សែភាពយន្តភាគខ្មែរថ្មីមួយ នឹងមានវត្តមាននៅលើកញ្ចក់ទូរទស្សន៍ប៉ុស្ត៍ ភីអិនអិន ក្នុងពេលឆាប់ៗនេះ ដើម្បីជាការឆ្លើយតបទៅនឹងការទន្ទឹងរង់ចាំពីសំណាក់ប្រិយមិត្ត ក៏ដូចជាអ្នកទស្សនាដែលនិយមគាំទ្រវិស័យភាពយន្តក្នុងស្រុក ។ រឿង «ក្រមុំឆ្នាស់ ប៉ះ មេស្រុកឆ្នើម» ជាខ្សែភាពយន្តដែលបង្កប់ទៅដោយឈុតឆាក កំប្លុកកំប្លែង និងមនោសញ្ចេតនាស្នេហាផ្អែមល្ហែម ដែលជាការជួបគ្នាដំបូងរវាងតារាសម្តែង កញ្ញា ពៅ លីដា និង លោក ប៉ែន ភ័ក្រ សុធារិទ្ធ ដែល ពៅ លីដា សម្តែងជាតួអង្គមេឆ្នោតក្រមុំឆ្នាស់ប្រចាំភូមិកំពូលល្បិចរូបស្អាត ហើយក៏ជាបងធំ និង អ្នកលក់ស្រាដ៏ល្បីប្រចាំភូមិគឺ កញ្ញា តី ប៉ះជាមួយ លោក ប៉ែន ភ័ក្រ សុធារិទ្ធ ជាតួអង្គមេស្រុកកំលោះដ៏សែនស្រស់សង្ហាវ័យ ៣២ ឆ្នាំ ឈ្មោះ ធារិទ្ធ នេះក៏ជាលើកទីមួយដែលពួកគាត់បានសម្តែងរួមគ្នា ។
នៅក្នុងសាច់រឿងនេះអ្នកទាំងពីរសុទ្ធតែខ្លាំងរៀងខ្លួន ជួបគ្នាពេលណាឈ្លោះពេលនោះ ព្រោះតួប្រុសជាអ្នកអនុវត្តន៍ច្បាប់ ឯតួស្រីជាអ្នកល្មើសច្បាប់ តែមិនទាន់បានបង្ក្រាបផងស្រាប់តែមេស្រុកកំលោះលង់ស្នេហ៍នឹងក្រមុំឆ្នាស់បាត់ទៅហើយ តើលោកមេស្រុកកំលោះត្រូវដោះស្រាយបែបណា ? តើអ្នកណាអាចបង្ក្រាបក្រមុំឆ្នាស់ម្នាក់នេះបាន ? មានតែ ភីអិនអិន ប៉ុណ្ណោះដែលអាចស្រាយចម្ងល់ទាំងនេះបាន ។
សូមកុំភ្លេចរង់ចាំតាមដានទស្សនាខ្សែភាពយន្តភាគខ្មែររឿង «ក្រមុំឆ្នាស់ ប៉ះ មេស្រុកឆ្នើម» ដែលនឹងមានចាក់ផ្សាយជូនទស្សនាក្នុងពេលឆាប់ៗនេះនៅលើកញ្ចក់ទូរទស្សន៍ប៉ុស្ត៍ ភីអិនអិន រៀងរាល់ថ្ងៃព្រហស្បតិ៍ ដល់ថ្ងៃសៅរ៍ វេលាម៉ោង ៧ និង ៥០ នាទី ដល់ម៉ោង ៩ យប់ ។
គាំទ្រភាពយន្តខ្មែរ ដើម្បីជាកម្លាំងចិត្តផលិកករខ្មែរ និង ភាពរីកចម្រើនវិស័យភាពយន្តនៅកម្ពុជា! ៕
តាមដានព័ត៌មានពីរឿងភាគ ភីអិនអិន សូមចូលទៅកាន់៖ www.facebook.com/PNNDramaFanClub
